DILI, 17 feveireiru 2020 (TATOLI) – Eis Primeiru-Ministru (PM), Marí Alkatiri hasoru malu ho Primeiru-Ministru (PM), Taur Matan Ruak, hodi fó informasaun kona-ba progresu Ró Haksolok ne’ebé dadaun ne’e seidauk to’o Timor-Leste.
Ró ne’e rasik, daudaun ne’e iha sidade Figueiru da Voz, Portugal, tanba iha problema kapasidade finanseira husi kompañia Atlantic Eagle Ship Building, ne’ebé hanesan responsável ba konstrusaun Ró-ahi Haksolok.
“Ha’u mai hasoru malu ho Primeiru-Ministru, tanba agora tenke foti desizaun ida importante ba Ró haksolok, ne’e mak ha’u hasoru hodi fó tan informasaun ruma. Desizaun atu kontinua kooperasaun ka la kontinua, Governu maka tenke deside”, informa Marí Alkatiri ba jornalista sira hafoin hasoru PM Taur iha Palásiu Governu, segunda ne’e.
Notísia Relevante: PM Delega Ministru Hermenegildo Akompaña Kazu Ró Haksolok
Eis Prezidenti Autoridade Rejiaun Administrativa Espesial Oé-Cusse-Ambeno no Zona Ekonomia Espesiál Ekonomia Sosiál Merkadu (RAEOA-ZEESM) ne’e hakarak Ró Haksolok tenke mai Timor-Leste.
“Ba ha’u dalan di’ak maka tenke kontinua koopera no tenke lori Ró Haksolok mai iha rai Timor-Leste”, dehan Marí.
Ró Haksolok ho kustu millaun €13,7, inaugura iha loron 26 maiu 2017 iha sidade Filguerra da Foz, Portugal no tuir informasaun sei to’o iha outubru 2017, maibé tanba problema internal husi kompaña Atlantic Eagle ship Building ho sub-kontratór maka to’o agora ró seidauk mai.
Ró ne’e rasik iha kapasidade atu tula ema na’in-377 no karreta hamutuk 15.
Prosesu konstrusaun Ró Haksolok ninia kontratu asina iha 2014 entre Governu no empreza portugés. Kontrusaun ró ne’e konsege paradu maibé bainhira estabelese ZEESM, prosesu konstrusaun ró-ahi ne’e entrega ba Autoridade maka responsabiliza.
Ferry Ró Haksolok, desizaun atu hili ninia estaleiru (fatin atu harii ró) hahú ho foti husi V Governu Konstitusionál ne’ebé lidera husi Kayrala Xanana Gusmão nu’udar Primeiru-Ministru, tuir ninia reprezentante husi Ministru Transporte no Komunikasaun, Pedro Lay da Silva, ne’ebé selebra kontratu ho estaleiru Atlantic Eagle ship Building Lda.(Atlanticeagle) iha loron 22 setembru 2014.
RAEOA-ZEESM simu prosesu konstrusaun ró liuhosi transferénsia projeto no elokasaun orsamentu husi Governu Timor-Leste ba Autoridade RAEOA-ZEESM hodi transfere poder no alokasaun verba ne’ebé akontese liu tiha akordu entre Governu no Estaleiru Atlantic Eagle ship Building no liu estaleiru hosi haú harii ró.
Atu garante implementasaun tuir espesifikasaun no padraun tékniku ba Ferry Ró Haksolok no assegura katak ró ne’e bele hetan rejistu internasionál (registo internacional de navios da Madeira em portugal) tuir rekezitu Governu Timor-Leste, RAEOA-ZEESM selebra kontratu supervizaun ba konstrusaun ferry ho instituto soldadura e Qualidade (ISQ) ne’ebé hanesan instituisaun ho esperiénsia liu tinan 50 ho konstrusaun ne’ebé kredénsial atu fiskaliza konstrusaun.
Jornalista: Antónia Gusmão
Editora: Julia Chatarina
