DILI, 25 fevereiru 2020 (TATOLI) – Diretór Operasaun Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA), Gabriel da Costa, hateten katak parte AIFAESA halo ona distruisaun ba produtu hamutuk 7.961, ne’ebé antes ne’e halo ona apreensaun husi fulan-novembru 2019 to’o janeiru 2020.
“Totál sasan ne’ebé maka ami halo apreensaun hodi mai halo destruisaun maka hanesan hahan iha kaixa hamutuk 30 ne’ebé liu prazu, produtu bebida lata hamutuk 712, ayam potong ne’ebé maka ami halo apreensaun iha loja Lucky Market, Audian iha tinan kotuk hamutuk 1.149, ayam buras 150, inklui produtu ne’ebé iha AIFAESA nia armajem rasik hamutuk 5.920”, nia informa hafoin ramata halo destruisaun ba produtu apreensaun iha Tibar, tersa ne’e.
Nia subliña, atividade ne’e bazeia ba Dektretu-Lei AIFAESA númeru 23/2017 nian kona ba destruisaun alimentu liu prazu ne’ebé komete husi operadór ekonomiku sira.
Ho nune’e, iha prosesu destruisaun ne’e komunidadade ne’ebé hela iha Tibar labele foti produtu sira hanesan tinan uluk bainhira AIFAESA halo destruisaun, hafoin ramata labarik sira ba foti fali produtu sira.
“Ami agora serbisu ho munisípiu Dili katak rai ne’ebé maka ke’e ona ba destruisaun maka tenke luan tuir lei númeru 4/2009 artigu 41 kona ba destruisaun ba produtu sira”, nia dehan tan.
Tanba ne’e, difísil ona ba komunidade sira atu hili fali produtu destruisaun ne’ebé maka AIFAESA destrui ona.
Iha atividade AIFAESA durante 2019 to’o Janeiru 2020, hala’o iha Tibar no hetan seguransa husi Polísia Nasionál timor-Leste (PNTL), Liquiçá no hetan partisipasaun másimu husi komunidade Tibar rasik , funsionáriu AIFAESA inklui mídia sira.
Jornalista: Natalino Costa
Editora: Julia Chatarina
