DILI, 05 marsu 2020 (TATOLI) — Maski virus Corona hahú ataka ema lubuk boot iha mundu, maibé iha Timor-Leste Organizasaun Mundiál Saúde (OMS/WHO sigla Inglés) ho Ministériu Saúde observa katak povu Timor-Leste sei livre hela hosi virus ne’ebé sai preokupasaun global ohin loron.
Notísia Relevante : Nasaun Viziñu Sira Hala’o Prevensaun Di’ak, Virus Corona Sei La To’o Timor-Leste
OMS bolu atensaun nafatin katak, mezmu nasaun no povu sei livre hosi virus ne’e, maibé ekipa saúde sira kontinua kontrolu no halo prevensaun makas iha área fronteira, portu no aeroportu.
“Iha ita nia nasaun viziñu hanesan Indonézia, Austrália no Singapura kona ona Virus Corona, maibé iha Timor-Leste dadus ne’ebé iha too agora ba investigasaun ne’ebé halo hosi Ministériu Saúde ho OMS hatudu katak, ita Timor ne’e sei livre hela hosi Virus Corona, maibé ne’e la dehan Virus Corona la tama mai Timor, lae, iha posibilidade karik atu tama hosi fronteira no aeroportu. Tanba ne’e, ita halo kontrolu makas hela,” dehan Ofisiál Planeamentu no Jestaun Programa OMS Timor-Leste, Luis dos Reis, ba jornalista, foin hala’o sosializasaun ba membru FALINTIL-Forsa Defeza Timor-Leste (F-FDTL) iha Kuartél Unidade Polisia Militár, Kintál Boot Dili, ohin.
Reprezentante OMS ne’e mós rejeita informasaun ne’ebé espalla iha rede sosiál Facebook katak, Timoroan balun ne’ebé servisu iha Embaixada Xina ba Timor-Leste sofre Virus Corona nu’udar informasaun ne’ebé laloos.
“Ate agora informasaun ne’ebé ami simu dehan Timoroan sira moras Virus Corona ne’e laloos ida,” Luis afirma.
Durante ne’e OMS ho Ministériu Saúde no Embaixada Xina rasik sempre servisu hamutuk hodi halo prevensaun makas ba Virus Corona.
OMS no Ministériu Saúde rasik prepara ona fatin kuarentena (fatin Izolamentu) ida ba kuakér Timoroan no estranjeiru maka sente moras no sintoma Corona presiza halo tratamentu saúde emerjénsia durante loron 14 too rekupera saúde.
Iha parte seluk, Luis dehan, OMS rasik hasai ona avizu ida hodi rekomenda ba populasaun hotu- hotu atu kuidadu sira nia saúde, presiza uza máskara iha fatin ne’ebé risku ba moras. Nune’e mós máskara ne’e uza so bainhira doutór no médiku sira halo tratamentu saúde ba ema ne’ebé sofre moras respiratóriu, fani, mear, dada iis boot maka bele uza máskara.
Jornalista : Eugénio Pereira
Editór : Francisco Simões
