DILI, 10 juñu 2020 (TATOLI) – Governu liuhosi reuniaun Konsellu Ministru estraordinária iha 20 abríl aprova ona pakote sosio-ekonómiku atubele hatan ba efeitu negativu husi pandemia globál COVID-19 iha ekonomia nasionál, nune’e Governu sei ezekuta rekursu fiskál no monetáriu ne’ebé presiza hodi garante ekonomia bele la’o nafatin durante krize surtu ne’e.
Maski Ministériu Koordenadór Asuntu Ekonómiku (MKAE) iha ona kalkulasaun hodi finansia polítika ho montante millaun $50 tuir proposta, maibé to’o agora parte balun seidauk bele realiza tanba osan iha Fundu COVID-19 la to’o.
Koordenadór Jerál Sekretariadu Konsellu Jestaun Fundu COVID-19, Januário da Gama, hateten presiza iha levantamentu estraordináriu husi Fundu Petrolíferu atu finansia despeza regulár no finansiamentu ba défise husi Fundu COVID-19, tanba Governu konsentra mós ba programa pakote sosio-ekonómiku no pagamentu ba subsídiu uma-kain, inklui atividade sira seluk.
“Sekretariadu tékniku simu proposta husi MKAE no identifika pur volta millaun $70, ne’ebé husi montante ne’e, millaun $50 mak dedika ba despeza pakote ekonómiku ninian, enkuantu millaun $20 atu halo rekobertura ba iha vijénsia iha Fundu COVID-19 rasik,” relata Koordenadór ne’e ba Agênsia Tatoli iha ninia kna’ar fatin Ministériu Finansa (MF), Aitarak-Laran, kuarta ne’e.
Tuir atuál Diretór Jerál Planeamentu Orsamentu MF ne’e, Tanba Governu seidauk bele deskobre katak COVID-19 ne’e bainhira mak termina, maka presiza rezerva iha fundu karik iha situasaun ruma ne’ebé nesesita apoia imediata bele utiliza orsamentu ne’e.
Januário hatutan, orsamentu millaun $50 ne’e kobre hotu ba planu porsentu 60 ba traballadór durante implementasaun Estadu Emerjénsia ligadu ho pandemia globál.
Antes ne’e MKAE aprezenta proposta ho montante millaun $142 ba pakote sosio-ekonomiku, no husi montante ne’e inklui mós pagamentu subsídiu uma-kain ninian, ne’ebé ba pagamentu ne’e Konsellu Jestaun Fundu-COVID-19 sei halo ona alterasaun ba Fundu COVID-19 orijinál.
“Entaun ninia adisionál ne’ebé presiza husi millaun $142 ne’e, purvolta millaun $50, nomontante ne’e inklui mós ba pagamentu porsentu 60 ba traballadór.
Pakote Sosiu-Ekonómiku Atu Kombate Efeitu Negativu Husi COVID-19
Pakote sosiu-ekonómiku kompostu husi implementa sistema universál ida kona-ba apoiu ne’ebé sei garante rendimentu mensál ba uma-kain hamutuk 214.000 resin no hein katak medida ne’e dura to’o fulan-tolu nia laran.
Nune’e mós, sei fó subsídiu ba funsionáriu sira husi setór formál ne’ebé hela iha kuarentena ka iha uma durante pandemia ne’e, Governu sei fó kontribuisaun to’o porsentu 60 husi kustu salariál, ba traballadór ne’ebé hetan suspensaun kontratu durante implementasaun Estadu Emerjénsia ligadu ho surtu COVID-19.
Sei sosa foos emerjénsia ba fulan-tolu atubele kompensa bainhira foos menus durante pandemia ne’e.
Governu mós fornese subsídiu atu garante konektividade, liuhosi kontratu ho Airnorth ne’ebé sei kontinua hala’o atividade bá-mai semana ida dala tolu husi Dili ba Darwin, hodi fornese ligasaun ekipamentu médiku no emerjénsia ne’ebé importante ba Darwin.
Sei fó subsídiu ba transporte marítimu merkadoria nia ne’ebé bá-mai Atauru no Oé-cusse, hodi estende deskarga iha portu marítimu durante oras 24 nia-laran, nune’e bele evita atrazu sira iha distribuisaun abastesimentu esensiál sira.
Sei fó pulsa gratuita ($15 kada fulan) ba eletrisidade no bee-moos mós sei gratuita, pagamentu ba kontribuisaun seguransa sosiál, tantu husi traballadór nune’e mós funsionáriu públiku.
Medida hirak ne’e inklui mós programa kréditu lubuk ida ho osan-funan ki’ik, garantia kréditu ba importadór sasán esensiál sira no empréstimu emerjénsia nian atu mantein empreza sira loke nafatin no atu apoia família sira hodi rezolve sira-nia difikuldade finanseira.
Sei implementa programa atu aumenta oferta ai-han iha parte Tasi Mane no Viqueque, no garante dispunibilidade fatór produsaun agríkola, pekuáriu no peska nian.
Aleinde ne’e, sei fó mós subsídiu ba estudante timor-oan hamutuk 4.200 ne’ebé hela iha rai-li’ur, ne’ebé iha hela situasaun difísil nia laran, enkuantu estudante timor-oan sira ne’ebé estuda iha rai-laran sei hetan subsídiu internet gratuita atu estuda liuhusi sistema online.
Sei dezenvolve sistema online ba akompañamentu kazu COVID-19 nian sira.
Kustu totál sei proporsionál ba impaktu emerjénsia sanitária nian no medida ekonómika sira sei dinámika no sei ajusta nafatin durante impaktu ekonómiku ne’e.
Jornalista: Antónia Gusmão
Editora: Julia Chatarina
