DILI, 23 juñu 2020 (TATOLI)-Governu Xina liuhosi ninia Embaixadór iha Timor-Leste, Xiao Jianguo, hateten nia Governu iha kompromisu atu kontinua fó apoiu ba Timor-Leste hodi rekupera hikas ekonomia nasaun nian tanba kauza husi COVID-19.
“Ohin ha’u ho Primeiru-Ministru (Taur Matan Ruak) ami ko’alia liu kona-ba ami sei apoiu nafatin Governu Timor-Leste hodi luta kontra COVID-19 no rekupera hikas ekonomia iha nasaun ne’e,” dehan Jianguo ba Jornalista Sira iha Palacio do Governo, Dili tersa ne’e.
Maibé nia seidauk adianta apoiu saida maka sira sei fó hodi rekupera ekonomia Timor-Leste nian.
Xina hakarak Timor-Leste tenke alkansa ho lalais ba ninia dezenvolvimentu ne’ebé la’o hela liliu iha área infraestrutura, ekonomia no seluk tan.
Kona-ba moras coronavirus, nia tenik tan maski TL daudaun ne’e livre ona husi pandemia globál ne’e maibé presiza atu antisipa nafatin hodi halo prevensaun ba transmisaun iha futuru.
Entretantu, Governu Xina antes ne’e fó ona apoiu ekipamentu prevensaun COVID-19 ba Governu Timor-Leste.
Jornalista : Hortencio Sanchez
Editór : Agapito dos Santos
