DILI, 15 jullu 2020 (TATOLI) – Sekretáriu Estadu Terra no Própriedade, Mário Ximenes hamutuk ho Grupu Arte Moris sira halo audiénsia ho Sekretáriu Estadu Komunikasaun Sosiál, Merício Juvinal dos Reis ‘Akara’ hodi hetan solusaun kona-ba fatin própriu ba grupu arte ne’e.
Antes ne’e, Sekretaria Estadu Komunikasaun Sosiál (SEKOMS) maka fasilita mediasaun entre Grupu Arte Moris ho veteranu sira, hamutuk ho Sekretaria Estadu Arte no Kultura (SEAK) hodi buka solusaun ba edifísiu.
Sekretáriu Estadu Mário informa iha loron hirak liubá membru Governu balun hasoru malu hodi ko’alia kona-ba asuntu fatin própriu no iha ona konkordánsia fatin ba Grupu Arte Moris.
“Grupu Arte Moris mesak ita-nia sidadaun timor-oan no ita-nia ema rasik, tanba ne’e Estadu iha kbiit tomak atu proteje sira no kria kondisaun. Loron-rua liubá ita halo ona enkontru ho membru Governu na’in-haat iha Gabinete SEAK atu buka solusaun no deside ona fatin rua atu fó ba sira iha Ministériu Turizmu Komérsiu Industria (MTKI) nia kotuk no ida ne’e permanente ona, ita fó ba sira no hein téknikamente sei ba koordena de’it ho pontu vokál tékniku sira atu hadi’a fatin, nune’e bele entrega ba sira hodi hala’o sira-nia atividade,” tenik governante ne’e hafoin enkontru ho Grupu Artes Moris iha salaun SEKOMS, iha Palásiu Governu, kuarta ne’e.
Notísia Relevante: Arte Moris Prontu Koopera ho Governu Entrega Edifísiu ba CCLN, Maski Hasoru Difikuldade
Iha loron 06 jullu, Prezidente Administrasaun Konsellu Kombatente Libertasaun Nasionál (CCLN, sigla portugés) , Vidal de Jesus ‘Riak Leman’ ho ninia ekipa hasoru malu ho Primeiru-Ministru, Taur Matan Ruak, hodi ko’alia kona-ba edifísiu ba konsellu ne’e hodi hala’o serbisu no iha enkontru ne’e Xefe Governu deside ona edifísiu Arte Moris Comoro oferese ba CCLN.
Iha enkontru membru Governu sira hodi deside fatin ba grupu arte ne’e, husu mós atu Grupu Arte Moris legaliza-an hanesan organizasaun Estadu tanba durante ne’e grupu refere nu’udar organizasaun privadu ne’ebé hala’o knaar.
“Ohin ha’u hateten ba sira katak tuir lei Estadu só atribui fatin ba organizasaun Estadu. Agora Arte Moris hanesan organizasaun privadu ne’ebé hakarak ka lakohi sira tenke regulariza atubele hala’o sira-nia atividade ho di’ak,” nia akresenta.
Parte Sekretaria Estadu Terra no Propriedade (SETP) nia knaar atu atribui de’it propriedade ba entidade sira.
“Fundu ne’e buat ketak ida, ohin ami-nia parte haree de’it ba proprietáriu Estadu nian ne’ebé maka ita bele atribui provizóriu ba sira hodi hala’o sira-nia kreatividade,” hateten Mário Ximenes
Kona-ba bainhira maka entrega edifísiu ba Arte Moris, tuir Sekretáriu Estadu aban grupu kreativu ne’e sei hasoru malu ho parte diresaun hodi hatudu fatin tanba iha ona desizaun entre Ministériu Justisa no SETP.
Iha fatin hanesan, Diretór Arte Moris, Iliwato Domabere, agradese ba esforsu Governu atu buka solusaun.
“Ami agradese ba esforsu ne’ebé maka Governu sira hola desde tetu to’o foti desizaun. Maibé husi inísiu kedan lori Arte Moris nia-naran no grupu hotu ne’ebé maka iha ne’ebá, agradese ba kooperasaun di’ak husi parte Governu atu buka solusaun di’ak ba ami-nia situasaun daudaun ne’e,” nia subliña.
Grupu Arte Moris eziste ona desde 2003 to’o agora, ne’ebé halibur hotu grupu seluk hanesan TERTIL, Galaxy Band, Banda Klamar, Naran La’ek hodi kontinua promove arte no talentu foinsa’e timor-oan sira.
Jornalista: Natalino Costa
Editora: Julia Chatarina
