DILI, 22 jullu 2020 (TATOLI) – Sekretáriu Estadu Formasaun Profisionál no Empregu, Alarico do Rosário, informa traballadór timor-oan na’in-10, kompostu hosi mane ualu no feto rua ho kondisaun di’ak no daudaun kontinua fali servisu hanesan bainbain, hafoin hetan insidente ahi-han sira-nia iha Otél Federal Backpacker Bundarberg Queensland, Austrália.
Akontesimentu ne’e iha segunda (20/07) maizumenus tuku 10:30 kalan oras Austrália.
“Sira-nia kondisaun di’ak tanba horiseik ami-nia diretór jerál sira halo vídio konferénsia ho sira liuhosi telemóvel no haree sira-nia kondisaun di’ak hela no agora sira kontinua fali servisu hanesan bain-bain,” Sekretáriu Estadu Alarico iha salaun Sekretaria Estadu Formasaun Profisionál no Empregu (SEFOPE), Caicoli, kuarta ne’e.
Nia dehan, akontesimentu ne’e traballadór ida maka nia pasaporte ahi-han tiha ka lakon maibé ida ne’e parte SEFOPE hato’o ona ba Ministériu Negósiu Estranjeiru no Kooperasaun (MNEK) hodi rezolve.
“Ita koko ko’alia ho MNEK atu trata asuntu ne’e, kestaun ne’e di’ak hela tanba entre Governu ho Governu maka sei rezolve,” nia akresenta.
Nia dehan, ahi-han otél ne’e hanesan insidente idane’ebé ema hotu la espera maibé bainhira akontese timor-oan sira halai hotu, ne’ebé laiha mak kanek no ho kondisaun di’ak hotu.
Iha sorin seluk, Embaixadór Austrália iha Timor-Leste, Peter Roberts, informa ahi-han otél ne’ebé timor-oan na’in-10 hela tanba rai-manas demais, tanba Austrália daudaun iha klima manas hanesan mós Timor-Leste no dalaruma mós bee la sufisiente.
“Ha’u kontente tebes tanba traballadór sira kanek laiha, sira hotu di’ak. Embaixada Timor-Leste no Governu Austrália sei suporta traballadór na’in-10 ne’e no ha’u rona katak sira sei kontinua serbisu iha Austrália,” diplomata ne’e subliña.
Jornalista: Natalino Costa
Editora: Julia Chatarina
