DILI, 23 jullu 2020 (TATOLI) – Relasiona ho aniversáriu Agência Tatoli ba dahaat, Sekretáriu Estadu Kooperativa (SEKoop), Elizário Ferreira husu ba mídia estatál ne’e hodi hatudu kualidade di’ak ein termu hakerek no públikasaun notísia sira.
“Ha’u-nia sujestaun maka mantein imi-nia hakerek sira ne’ebé di’ak, atu nune’e bele asegura imi-nia imajen di’ak iha públiku hodi kontribui ba dezenvolvimentu komunikasaun sosiál nian. Ami husu ba Agência Tatoli hatudu nafatin imi-nia kualidade,” tenik Sekretáriu Estadu Elizário ba Agência Tatoli, iha ninia knaar fatin, edifísiu Akait, foin lalais ne’e.
Biban ne’e, governante ne’e kongratula mídia Estadu ne’e ba dahaat no espera ho ezisténsia ne’e nia parte fiar bele kontinua hatudu kualidade.
“Ha’u hakarak fó parabéns ba ezisténsia Tatoli, tanba durante tinan barak ona maka oferese notísia ne’ebé di’ak ho kualidade, eskritór sira ne’ebé maka hatun notísia ne’ebé furak iha parte públiku no akompañamentu ne’ebé di’ak, tanba ne’e maka ha’u-nia privadu rasik no parte SEKoop mós apresia ho notísia sira ne’e hotu. Kontinua ita bo’ot sira-nia servisu hanesan mídia ne’ebé maka profisionál no sustentável ho rekursu ne’ebé maka di’ak,” nia subliña.
Nia husu, ba oin Agência Tatoli presiza rigór iha públikasaun, nune’e bele asegura nafatin produtu jornalístiku.
Jornalista: Natalino Costa
Editora: Julia Chatarina
