DILI, 24 jullu 2020 (TATOLI) – Diretór Ezekutivu Rádiu Komunidade Comoro, Natalino Fernandes Ximenes, hateten durante ne’e programa streaming iha Rádiu komunidade Comoro daudaun la’o ladún efetivu tanba problema internet.
“Kona-ba rádiu streaming iha Rádiu Komunidade Comoro, daudaun la’o di’ak maibé ladún efetivu tanba presiza apoiu rede internet. Apoiu fundu ba internet ho valór $200, ba fulan-haat hosi abríl to’o jullu ne’ebé kada fulan $50 ramata ona, tanba provizóriu fundu traferénsia la mai ona kuaze fulan-haat. Entaun ami tenke halo esforsu seluk atu hetan fundu apoiu ba rádiu streaming ho internet $50 ba semana ida,” tenik Dirijente ne’e, foin lalais iha Radiu Komunidade Comoro.
Nia dehan, maski hasoru dezafíu tanba internet, maibé nia iha esperansa ministériu ne’ebé tutela iha áre komunikasaun sosiál bele fó tulun.
Iha loron 29 maiu 2020, Sekretaria Estadu Komunikasaun Sosiál (SEKOMS) liuhusi Diresaun Nasionál Sentru Rádiu Komunidade (CRC, sigla portugés) lansa rádiu streaming online ba rádiu komunidade 14.
Rádiu komunidade Comoro ho nia sítiu eletróniku (online) ho enderesu www.radiocomoro.org.
Programa ne’e ho hanoin ida atu moderniza divulgasaun informasaun husi analog ba dijitál hodi fasilita informasaun ba povu ho di’ak liután.
Tuir dadus ne’ebé SEKOMS rekolla katak kuaze porsentu 60 populasaun iha Timor-Leste maka iha ona telefone hodi bele asesu informasaun husi no live streaming sira no sítiu eletrónika sira.
Jornalista: Natalino Costa
Editora: Julia Chatarina
