DILI, 23 jullu 2020 (TATOLI) – Iha ámbitu vizita Rádiu Voz FM no Rádiu Ramelau Kablaki Matebian (Rakambia), Ministru Asuntu Parlementár no Komunikasaun Sosiál, Francisco Jerónimo, hateten nia parte sei kontinua hakbi’it mídia sira hodi bele eziste nafatin.
“Governu sei la taka matan ba mídia sira no sei kontinua hakbi’it hodi mídia sira bele eziste nafatin,” tenik Ministru Francisco, durante vizita Rádiu Voz FM iha Delta, kinta ne’e.
Iha biban ne’e, governante ne’e apresia ba fasilidade ne’ebé maka rádiu ne’e iha tanba nu’udar rádiu rejioza ida maibé iha fasilidade sufiente.
“Ha’u apresia ita bo’ot sira tanba hahú moderniza-an liuhosi dijitalizasaun ne’ebé ouvinte sira bele akompaña informasaun di’ak liu. Tanba daudaun Governu hahú dijitaliza rádiu komunidade balun hodi hafasil komunidade sira iha territíriu laran hodi bele asesu informasaun ho di’ak liután,” nia akresenta.
Governante ne’e nota, maski Rádiu Voz enfrenta problema tékniku maibé Governu liuhosi ministériu tutela sei ajuda.
“Governu sei apoiu tékniku ba Rádiu Voz hodi haree tanba ita iha departamentu audio vizuál ne’ebé iha Sekretaria Estadu Komunikasaun Sosiál (SEKOMS) hodi bele fó asisténsia tékniku,” nia subliña.
Iha fatin hanesan, Diretór Rádiu Voz FM, Elienae Alves Moura, agradese tebes ba vizita ne’e tanba bele hato’o preokupasaun ne’ebé durante ne’e rádiu ne’e hasoru.
“Ami sente haksolok no ondradu tebes tanba ba dahuluk hafoin 18, membru Governu ida bele hit-an hodi mai visita iha Rádiu Voz,” nia agradese.
Tuir Jerente ne’e, maski rádiu ne’e dijitaliza ona maibé sei iha difikuldade iha asisténsia téknika rádiu nian, maibé iha vizita ohin parte Governu promete sei apoiu parte tékniku sira.
Maski nune’e, nia dehan Rádiu Voz durante ne’e funsiona ho di’ak liuhosi ninia programa sira.
Vizita Ministru Francisco ba Rádiu Rakambia
Iha oportunidade seluk, Ministru Francisco apresia vizita iha Rádiu Rakambia tanba bele ba haree direita kondisaun rádiu nian.
“Ha’u mai lori mensajen ba imi nu’udar membru Governu, ha’u hateten Governu kontinua apoia mídia sira nune’e bele nafatin eziste hodi halo funsaun divulga informasaun,” dehan Ministru.
Nia konsidera vizita ne’e bele hatene liután dezafíu ne’ebé mídia sira enfrenta, nune’e ba oin bele fó apoia ba mídia sira.
Governante ne’e mós sei buka meiu hodi fó apoiu ba Rádiu Rakambia, atu nune’e bele dijitaliza-an tanba rádiu komunidade iha munisípiu balun ne’ebé dijitalizadu ona.
Nune’e mós, Diretora Rádiu Rakambia, Cristina Belo, haksolok ho vizita Ministru Francisco tanba bele fortifika kooperasaun iha futuru.
“Ami sente kontete ba vizita ne’e tanba bele fortifika relasaun kooperasaun ho Rádiu Rakambia ho di’ak liu iha futuru,” nia subliña.
Jornalista: Natalino Costa
Editora: Julia Chatarina
