DILI, 30 jullu 2020 (TATOLI)-Relasiona ho aniversáriu dahaat Agência Tatoli iha loron 27 jullu, Asosiasaun Defeza Konsumidór Timor-Leste, Tane Konsumidór, felisita mídia Estadu ne’e no husu nafatin hatutan povu nia lian.
“Lori membru no estrutura tomak Tane Konsumidór nian, hato’o parabéns ba Tatoli, maski foin tinan-haat maibé sai nu’udar mídia ne’ebé sempre kobre interese nasionál, husu atu nafatin hatutan povu nia lian,” tenik Prezidente Tane Konsumidór, António Ramos da Silva ‘Naikoli’, ba Agência Tatoli, iha edifísiu Tane iha Vila-Verde, kinta ne’e.
Prezidente Tane konsidera importante atu mídia online ne’e sai ona hanesan ajénsia informasaun ofisiál Estadu ne´ebé reprezenta Timor-Leste iha mundu hodi hatutan povu no nasaun nia lian ba mundu.
Asosiasaun ne’e nota durante ne’e, Agência Tatoli sai hanesan parseiru ne´ebé durante tinan-rua ho resin hatutan konsumidór sira-nia lian no lori konsumidór sira hetan informasaun kona-ba sira-nia dirietu no devér.
Jornalista : Natalino Costa
Editora: Julia Chatarina
