DILI, 12 agostu 2020 (TATOLI)-Vise Ministru Saúde, Bonifácio Maucoli dos Reis, informa United Nations Development Programme (UNDP-sigla inglés) to’o oras ne’e entrega ona ekipamentu prevensaun COVID-19 faze dahuluk no daruak nian ba Ministériu Saúde hamutuk item 33.
Governu aprova osan millaun $ 5.8 ba UNDP hodi sosa ekipamentu ba prevensaun pandemia globál surtu coronavirus no medikamentu ba moras sira seluktan.
”Ekipamentu ne’ebé mak ita sosa liuhusi UNDP ne’ebé to’o ona Timor mak ai-moruk esensiál, ventiladór 10, ai-moruk medikamentu no mós ekipamentu ba protesaun individuál,” informa Governante iha Armazén SAMES Kampung-Alor, kuarta (12/08).
Notísia Relevante :PNUD Hatama Ona Ekipamentu Prevensaun COVID-19 Mai TL
Iha faze dahuluk, Organizasaun Internasionál ne’e entrega ona ekipamentu no medikamentu ba Governu liuhosi Eis Ministru Negósiu Estranjeiru no Kooperasaun, Dionísio Babo da Costa, iha loron 29 fulan-maiu.
Faze daruak nian, UNDP entrega fasilidades hirak ne’e ba Vise Ministru Negósiu Estranjeiru no Kooperasaun, Julião da Silva, iha ínisiu fulan-jullu hanesan infusion pumps hamutuk 50, surgical masks 200, infrared thermometer 150 no mós item sira seluk tan.
Tuir planu faze datoluk nian, sei mai tan Timor-Leste iha tempu badak ho fasilidades hanesan ventiladór 40, máskara no seluk tan.
Iha fatin hanesan Diretór Ezekutivu Servisu Autónomu Medikamentu no Ekipamentu Saúde (SAMES), Santana Martins, klarifika sasán ne’ebé maka Ajénsia Internasionál ne’e sosa maka ventiladór 10 no seluk ne’e maioria medikamentu.
Notísia Relevante :UNDP Entrega Fasilidade Prevensaun COVID-19 Faze Daruak ba Governu
“Tuir informasaun iha fulan-agostu nia rohan ne’e ita sei simu tan ekiapmentu ne’ebé mak sei dalan ne’e,” katak nia.
Jornalista : Felicidade Ximenes.
Editór : Agapito dos Santos
