DILI, 21 agostu 2020 (TATOLI)–Emprezáriu timor-oan no atuál Prezidente Movimentu Asaun Ekonomia Komunitária (MAEKOM), Rui Castro, preokupa ho atendimentu Servisu Rejistrasaun no Verifikasaun Emprezariál (SERVE) tanba bainhira trata dokumentu lisensa ba negósiu bele lori tempu.
Tuir Prezidente MAEKOM, membru barak iha inisiativa halo negósiu, maibé atu trata dokumentu lisensa maka kleur, tanba ne’e membru sira realiza uluk negósiu maka foin trata dokumentu lisensa negósiu.
“Membru MAEKOM harii sira-nia negósiu rasik no dalaruma sira-nia forsa laiha, maibé atu hetan lisensa hosi SERVE maka kleur liu, presiza fulan-rua mós susar loos, dalaruma to’o tolu tán. Atu hetan lisensa ida presiza rekomendasaun hosi diresaun no lori tempu,” relata Rui Castro iha ámbitu lansamentu Restaurante Mr. Frango iha Caicoli, sesta ne’e.
Notísia Relevante: Ohin, SERVE hahú simu pedidu rejistu emprezariál liuhosi email
Nia dehan, aleinde ne’e dokumentu ida bainhira submete ohin, funsionáriu ida iha SERVE maka kuriji maibé to’o aban funsionáriu foun ida mak kuriji filafali.
“Bainhira ba haree dokumentu, funsionáriu seluk mak kuriji, ita lahatene atu kuriji to’o dala hira,” nia preokupa.
Tuir emprezáriu timor-oan ne’e, iha situasaun nasaun hasoru kriji mundu tomak buka hela investór no buka maneira hotu atu simplifika burokrasia.
“Espera katak polítika reforma ne’e bele hetan modelu loloos atu simplifika burokrasia ba lisensa ne’ebé loloos no la persiza inventa tun-sa’e,” nia akresenta.
Antes ne’e, hahú loron 10 agostu 2020, SERVE simu ona pedidu rejistu emprezariál liuhosi email atu asegura no kontribui ba realizasaun polítika Governu hodi hasa’e kualidade no prestasaun servisu ba atendimentu ba públiku no elimina kustu no tempu.
Servisu rejistrasaun ne’e simu pedidu liuhosi email ba prosesu pre-verifikasaun.
Jornalista: Antónia Gusmão
Editora: Julia Chatarina
