DILI, 24 agostu 2020 (TATOLI)-Xefe Sentru Saúde Hatulia B Munisípiu Ermera, Maria Magdalena Leto Mali, relata durante fulan-agostu ne’e rejista pasiente ho kazu infesaun vias respiratóriu ka ISPA hamutuk 364 no diaréa 104.
Sentru Saúde Hatulia B inagura husi Ministra Saúde, Odete Maria Freitas Belo, no Vise Ministru Saúde, Bonifácio Maucoli dos Reis, iha loron 08 fulan-agostu 2020, hafoin inagura to’o ohin loron atende ona pasiente 718 maka halo ona tratamentu saúde iha fatin ne’ebá.
Notísia Relevante :MS inagura Sentru Saúde Hatulia B
“Hahú hosi Sentru Saúde ne’e inagura to’o mai ohin loron só ISPA ho diarea de’it mak númeru aas, foin loron tolu liuba labarik na’in tolu mak ami transfere mai Ospitál Gleno tanba sofre diareia seluk ne’e hala’o de’it tratamentu iha Sentru Saúde,” dehan nia ba jornalista sira iha Otél Novo Turizmu Dili, segunda ne’e.
Durante besik fulan ida, nia dehan foin iha inan isin-rua na’in lima maka partu ona iha Sentru Saúde ho kondisaun normal ho bebe feto na’in rua no mane na’in tolu.
Sentru Saúde Hatulia B fó atendimentu ba komunidade husi suku lima maka hanesan Fatubolu, Lisapat, Urahou, Mau Ubu no Fatubesi.
Jornalista : Hortencio Sanchez
Editór : Agapito dos Santos
