DILI, 03 setembru 2020 (TATOLI)- Prezidente Administrasaun Institutu Seguransa Sosiál (INSS), Longuinhos Armando Leite informa katak INSS haruka ona naran idozu ne’ebé mak lasai iha momentu pagamentu ba faze dahuluk nian iha tinan ne’e ba Banku Nasionál Komérsiu Timor Leste (BNCTL, sigla portugés) hodi simu sira-nia direitu.
“Ami haruka ona idozu ne’ebé mak naran lasai hamutuk 728 ba BNCTL atu halo fali pagamentu ba sira tanba ami konfirma ho ami-nia sistema INSS katak durante ne’e ema ne’e simu duni só tinan ida ne’e mak naran laiha entaun ita konsidera nafatin sira-nia direitu,” Prezidente Administrasaun INSS, Longuinhos Armando Leite ba Agência TATOLI, iha nia knaar fatin Caicoli, Dili, kinta ne’e.
Tanba ne’e, nia husu ba idozu sira atu kontinua hein bainhira pagamentu Bobonaro ho RAEOA finaliza mak kontinua fali ho idozu sira ne’ebé naran lasai ne’e.
“Ita servisu ho sistema mak nune’e duni tanba ne’e pasiénsia no labele hirus,” Prezidente INSS sujere.
Autoridade másima INSS ne’e esklarese katak naran idozu ne’ebé mak lasai iha lista pagamentu nian ne’e tanba maioria karta deklarasaun justifika hatete katak idozu ne’e mate ona. Entaun sira-nia naran labele sai iha lista pagamentu nian.
Ida seluk mak iha segunda faze iha 2019 ne’e sira lasimu osan ho razaun ferik katuas halo lia no halo to’os entaun dala ruma naran labele sai. Ida seluk mak tinan kotuk sira simu ona osan maibé ba tinan ne’e naran lasai dala ruma naran sala ka hamoos lakon tiha.
“Ita lahatene dala ruma mós naran xefe suku sira mak fó naran mai iha Seguransa Sosiál. BNCTL mak halo pagamentu no INSS ne’e tékniku ne’ebé bainhira halo crosscheck (verifikasaun) mak keta hamoos tiha karik ita labele hatene,” nia konsidera.
Notísia relevante:MSSI Konklui Ona Pagamentu ba Idózus ho Invalidés 98.052
Jornalista : Osória Marques
Editór : Cancio Ximenes
