DILI, 03 setembru 2020 (TATOLI)-Institute Of Bussines (IOB) iha tempu badak sei halo graduasaunba estudante finalista hamutuk 300-resin hafoin hetan despaixu husi Governu liuhusi Ministériu Ensinu Superiór Siénsia no Kultura (MESSK).
Magnífiku Reitór IOB, Augosto da Conceição Soares, hateten IOB hatama ona pedidu graduasaun ba MESSK iha fulan-marsu 2020 maibé to’o ohin seidauk hetan aprovasaun.
“Ami hein de’it despaixu ministru nian kuandu iha ona ami bele deside ona data fiksu atu selebra graduasaun ba estudante sira, kuandu laiha despaixu Instituisaun mós la barani atu foti risku ,” dehan nia ba Tatoli iha IOB Fomentu Dili, kinta ne’e.
Finalista husi Fakuldade Ekonomia Negósiu no Fakuldade Komunikasaun Téknolojia maka sei halo graduasaun ho grau akadémiku baxarellatu (DIII) no lisensiatura (S1).
Fakuldade Ekonomia Negósiu kompostu husi Departementu Jestaun Finanseiru, Kontabilidade, Jestaun no Estudu Dezenvolvimento. Fakuldade Komunikasaun Tekonolojia kompostu husi Departementu Téknika Informátika, Jestaun Informátika, no Kontablidade Komputadór.
Jornalista : Tomé Amado
Editór : Agapito dos Santos
