DILI, 03 setembru 2020 (TATOLI)-Vizita domisiliáriu husi programa saúde iha família ho objetivu atu hakbesik saude ba populasaun no mos deteta difikuldade família uma-kain idaidak liliu ba problema sosiál, ekonomia liga ho moras sira.
”Kada uma-kain mak iha moras tubercoluse ida atu halo tratamentu mak postu saúde dook entaun pesoál saúde sira tenki hakbesik ba komunidade sira nia uma tenki identifika hasai kabeen tasak hodi halo tratamentu fulan-ualu nia laran para bele rekupera filafali tanba ne’e mak hanaran vizita saúde iha familia,” dehan Vise Ministru Saúde, Bonifácio Maucoli dos Reis, iha Suku Balibar, Munisípiu Dili.
Notísia Relevante :Sistema saúde iha família sei lori saúde bá hakbesik komunidade
Tuir Planu Estratejiku Dezenvolvimentu Setór Saúde 2011 to’o 2030 katak Timor-Leste tenki saudavel entaun liuhusi apoiu prestasaun saúde ba komunidade.
Objetivu dezenvolvimentu sustentavel hateten sei la husik ema ida iha kotuk, tanba ne’e maka oras ne’e destakamentu profisionál saúde sira to’o iha baze hodi fó tratamentu saúde ba komunidade.
MS mós re-ativa ona sistema dijitalizasaun liuhosi rejistu eletrónika nune’e bele fó atendimentu saúde diak liután ba populasaun.
Iha tempu hanesan Administradór Postu Aileu, João do Rego, garante programa saúde iha família sei hakbesik liután saúde ba komunidade sira to’o área remotás.
”Entaun moras hotu hotu ne’ebé mak iha pesoál saúde tenki la’o ba komunidade sira tanba dook atu asesu ba iha sentru saúde sira entaun programa ne’e bele hakbesik ba komunidade sira atu bele deteta sira nia moras iha sira nia hela fatin,” nia hateten.
Notísia Relevante :MS hahú halo vizita domisiliáriu ba komunidade
Jornalista : Felicidade Ximenes
Editór : Agapito dos Santos
