DILI, 11 setembru 2020 (TATOLI)-Prezidente Organizasaun Persaudaraan Setia Hati Terate (PSHT), Baltazar Lemos, husu ba membru organizasaun hotu ne’ebé foinlalais ultra pasa fronteira hodi sa’e sintu iha Indonézia atu koopera ho seguransa hodi tama kuarentena obrigatóriu ba prevene transmisaun surtu COVID-19 iha Timor-Leste.
“Ha’u husu ba alin sira foinlalais sai ba iha liur ne’eba fila ona mai karik ha’u husu ba ita nu’udar ema umanu tenke koopera hamutuk ho Estadu no Seguransa hodi tama iha kuarentena para ita haree COVID-19 keta kona karik bele prevene kedan,”dehan lider PSHT ne’e ba Tatoli iha SEJD Lecidere, sesta ne’e.
“Ha’u rona alin sira balu iha Colmera, Hera seidauk koopera ida entaun favor tenke koopera,” nia hateten.
Enkuantu, membru hirak ne’ebé Polisia kaptura ona tenke hakruk ba lei tanba antes ne’e, Lideransa PSHT fó sai ona karta eskrita atu labele ultra pasa fronteira maibé membru sira lá kumpre.
“Polisia kaptura ita boot sira ne’e, sira nia direitu atu prosesu ita boot sira tuir lei ne’ebé iha,” tenik tan.
Nia mós apela atu membru hotu-hotu tenki kolabora ho Estadu no Governu hodi hametin estabilidade ba povu.
PSHT prontu kolabora ho Governu liliu Sekretariu Estadu Juventude no Desportu (SEJD) hodi prodúz lei atu regula arte-marsiál iha futuru.
“Atu ita nia nasaun lao di’ak husu ba ita boot sira membru hotu atu hakmatek, durante loron hira mai ne’e ka tinan hira mai ne’e, bainhira ita-nia lei seidauk loos labele lai halo buat ida, kuandu lei lao loos ona ita foin bele hala’o atividade tomak iha ita-nia nasaun laran,” tenik tan.
Iha fatin hanesan, Sekretariu Estadu Juventude no Desportu, Abrão Saldanha, hatete bolu lideransa hosi PSHT atu koalia kona-ba loron hira ba kotuk iha mídia sosiál públika membru PSHT barak ultra pasa fronteira hodi ba sae sintu iha Indonézia.
“Ha’u mak bolu lideransa PSHT nian tanba loron hira ba kotuk ita hare publikasaun iha media sosial membru barak mak kruza fronteira hodi ba sae sintu. Entaun ha’u bolu sira mai para ko’alia ba nia membru sira oinsá mak bele kontrola membru sira,” katak nia.
Jornalista : Hortencio Sanchez
Editór : Agapito dos Santos
