DILI, 15 setembru 2020 (TATOLI)-Voo umanitária ho aviaun Malaysia Airlines hosi Kuala Lumpur mai Dili, Timor-Leste, tula pasajeiru na’in-35 to’o iha Aeroportu Internasionál Nicolau Lobato, Comoro, iha tuku 09:25.
Reprezentante Programa ai-han mundiál (WFP, sigla inglés) iha Timor-Leste, Dangeng Liu, hateten voo ne’e ba dasia, hafoin estende tan voo ba dala-rua.
“Ohin voo WFP ho Malaysia Airlines tula pasajeiru umanitária hamutuk ema na’in-64 mai Timor-Leste, na’in-35 tun iha Dili no pasajeiru 29 kontinua viajen bá Papua Nova Guinné,” informa Dangeng Liu iha Aeroportu Comoro Dili, tersa ne’e.
Tuir Reprezentante WFP ne’e, pasajeiru ne’ebé tun iha Dili maioria antes ne’e serbisu iha Timor-Leste hamutuk ho Organizasaun Naun Governamentál (ONG) no mós Organizasaun Mundiál Saúde (OMS).
Aleinde ne’e, aviaun ne’e tula mós ekipamentu médiku hamutuk kilograma 394 ba OMS hanesan oxijéniu no no sasán importante seluk ba saúde.
Nia dehan, servisu umanitáriu ne’e semo tuir orsamentu ne’ebé prevee hosi WFP, to’o de’it outubru 2020.
“Ita hatene katak voo komersiál ne’e laiha ona no aviaun WFP maka sei semo tuir de’it orsamentu ne’ebé iha no semo to’o outubru 2020, tanba ne’e ami husu ba Governu karik bele estende tan voo atu nune’e liu fulan-outubru ne’e aviaun kontinua semo nafatin tanba ami mós sei lori tan traballadór saúde sira barak mai atu kombate COVID-19,” nia subliña.
Nia garante, pasajeiru sira ne’ebé tama mai Timor-Leste sei tuir nafatin protokolu saúde ne’ebé estabelese hosi Ministériu Saúde no OMS, ne’ebé sei kumpre konfinamentu obrigatóriu durante loron-14.
Iha kuarta (16/09), aviaun alugadu hosi WFP hosi Papua Nova Guinné mai Dili ho pasajeiru hamutuk na’in-23, to’o tuku 11:30 dader, hafoin sei bá Kuala Lumpur tuku 13:30
Jornalista: Natalino Costa
Editora: Julia Chatarina
