DILI, 28 setembru 2020 (TATOLI)–Ekipa COVID-19 husi Ministériu Saúde, iha segunda ne’e, deteta tan sidadaun Indonézia na’in ida pozitivu COVID-19.
Koordenadora Jerál COVID-19 Ministériu Saúde, Odete da Silva Viegas, informa pasiente ne’e, Ministériu Saúde izola ona iha sala izolamentu Sentru Saúde Vera Cruz, Dili.
Notísia Relevante :Sidadaun indonéziu na’in ida kona tan COVID-19
Sidadaun Indonézia ne’e ho idade 39, ne’ebé ho ninia viajen husi Medan, Indonézia, iha loron 11 fulan-setembru, mai iha Kupang, Nusa Tenggara Timur (NTT), iha loron 12 fulan hanesan no tama iha fronteira terrestre Motain, Batugade Munisípiu Bobonaro iha loron 13 fulan-setembru liubá.
”Pasajeiru ne’ebé mak mai iha momentu ne’ebá hamutuk 168 no husi 168 ne’e 166 submete ba kuarentena obrigatóriu ne’ebé Governu prepara no ema na’in rua mak auto-kuarentena,’’ Diretora Jerál Prestasaun Saúde, Odete da Silva Viegas, dehan ba jornalista sira durante konferénsia imprensa, segunda ne’e, iha Sala Izolamentu Vera Cruz, Dili.
Sidadaun na’in 13 seluk maka durante ne’e halo kuarentena hamutuk ho pasiente iha Otél Faról tanba ne’e sira sei kontinua halo kuarentena tan durante loron 14 komesa husi segunda ne’e no sei ramata iha inísiu fulan-outobru.
Entretantu, tuir dadus komulativu hahú husi loron 6 fulan-marsu tinan to’o loron 28, setembru 2020 totál numeru teste hamuutk 7.791 hein rezultadu 493, rezultadu negativu 7.270 kazu konfirmadu to’o ohin loron hamutuk 28 rekuperadu 27 ona no na’in ida sei halo tratamentu saúde.
“Iha oportunidade ne’e hakarak apela ba komunidade ka públiku katak relasiona ho informasaun ne’ebé mak espalla iha públiku kona-ba deskriminasaun no autorizasaun ba auto-kurentena atu esklarese katak komisaun ezekutivu COVID-19 to’o ohin loron fó dalan no fasilita ba sidadaun hotu ne’ebé mak hakarak husu auto-kuarentena maibé tenki prenxe kritéria no profisionál saúde mós tenki halo inspesaun ba fatin auto-kuarentena,” nia apela.
Notísia Relevante :Sidadaun Indonézia na’in ida iha TL rekuperadu husi COVID-19
Jornalista : Felicidade Ximenes
Editór :Agapito dos Santos
