DILI, 30 setembru 2020 (TATOLI)-Ministériu Ensinu Superiór Siénsia no Kultura (MESSK), iha loron 30 fulan-setembru ne’e estabelese ona memorandu intendimentu ida (MoU-sigla inglés), hodi servisu hamutuk iha área estatístika no finansa.
Diretór Jerál Administrasaun no Finansa Ministériu Ensinu Superiór Siénsia no Kultura (MESSK), Hernanio da Costa, informa akordu ne’e hodi hametin relasaun entre Diresaun Estatístika Ministériu Finansa nian ho Diresaun Jerál Administrasaun finansa, Ministériu Ensinu superiór nune’e bele tulun malu iha área finansa no estatístika.
“Ita hotu hatene daudauk ne’e ami prepara hela dadus estatístika iha ensinu superiór ba kapitál umanu ne’ebé ita iha,” nia dehan ba jornalista sira iha edifísiu MESSK Colmera Dili.
MoU ne’e estabelese tanba Funsionáriu husi MESSK nian seidauk iha koñesimentu naton iha área estatístika nian.
“Ita haree Diresaun Jerál Estatístika Ministériu Finansa nian tinan barak ona la’o kapas tebes no sira mós iha rekursu ne’ebé di’ak tebes, ho nune’e mak sira sei prepara Ministériu Ensinu Superiór nia Funsionáriu sira atu prepara ministériu nia dadus estatístiku ho relasaun Ensinu Superiór nian di’ak liután,” nia hateten.
Jornalista: Hortencio Sanchez
Editór :Agapito dos Santos
