DILI, 18 outubru 2020 (TATOLI)–Jerente Sriwijaya iha Timor-Leste, Dirham Wahyudi, informa voo NAM Air ho destinasaun Kupang mai Dili, lori sidadaun Indonézia mai hamutuk na’in-44 no aterra iha Aeroportu Internasionál Prezidente Nicolau Lobato, Comoro, iha tuku 13:00.
“Aviaun ne’e ohin hosi Kupang 11:55 no to’o iha Dili tuku 13:00, tula pasajeiru 44 de’it no lori sasán pasajeiru sira-nia de’it,” Jerente ne’e informa ba Agência Tatoli via telemóvel, domingu ne’e.
Hafoin voo hosi Dili fila ba Kupang iha tuku 14:35 no to’o iha ne’ebá tuku 15:00.
Empreza Wijaya Karya iha Timor-Leste, ho koordenasaun Embaixada Indonezia sei halo tan charter aviaun hodi lori sidadaun Indonézia sira mai Timor-Leste.
“Ha’u hanoin sei iha tan charter ba NAM Air hosi Wijaya Karya hodi hodi lori tan sidadaun Indonézia sira ne’ebé maka hakarak fila mai Timor-Leste, tuir informasaun ne’ebé ha’u rona aban ka bain-rua sei iha tan,” nia realsa.
Jornalista: Natalino Costa
Editora: Julia Chatarina
