DILI, 20 outubru 2020 (TATOLI)–Ministru Asuntu Parlamenár no Komunikasaun Sosiál (MAPKOMS), Francisco Jerónimo, hala’o sorumutuk ho ofisiál komunikasaun sosiál sira hosi kada institusaun Governu iha Palásiu Governu, atu avalia progresu serbisu.
“Objetivu sorumutuk ne’e atu halo avaliasaun ba progresu ne’ebé mak ofisiál komunikasaun sosiál sira halo ona no mós haree filafali saida mak presiza atu halo, nune’e bele iha koordenasaun di’ak hodi kontribui ba serbisu ne’ebé efikáz no efisiénsia iha ámbitu serbisu komunikasaun sosiál,” Ministru Francisco hateten liuhosi nota ne’ebé Agência TATOLI asesu, tersa ne’e.
MAPKOMS iha papél importante atu halo koordenasaun ho liña ministeriál sira iha programa diseminasaun informasaun kona-ba asaun governativa.
Tuir polítika VIII Governu Konstitusionál, populasaun tenke hatene saida mak sira Governu halo, tanba ne’e mak konsentrasaun iha programa diseminasaun informasaun nian tenke ba to’o iha povu iha área rurál.
Liuhosi sorumutuk ne’e informa mós kona-ba programa Governu ne’ebé sei implementa iha tempu badak.
“Sorumutuk ne’e atu hahú halo koordenasaun implementa programa Diseminasaun Informasaun Nasionál (DIN) iha nível nasionál to’o munisipál no área rurál sira tanba informasaun hotu ne’ebé iha relasaun polítika no programa VIII Governu Konstitusionál tenke to’o komunidade sira-nia leet ho forma ida programadu, sistemátiku no orientadu,” governante ne’e akresenta.
Programa ne’e tuir planu sei implementa iha novembru no dezembru 2020 iha munísipiu Covalima, Bobonaru no Rejiaun Administrativa Espesiál Oé-cusse Ambeno (RAEOA).
Iha sorumutuk ne’e, MAPKOMS liuhosi ekipa téknika halo aprezentasaun ida kona-ba lala’ok programa Talk Show Rádiu Parlamentár, tanba ne’e husu kolaborasaun ofisiál komunikasaun sosiál hotu atu iha koordenasaun di’ak implementa programa.
Ajenda ikus iha enkontru regular ne’e maka diskusaun téknika atu prepara ekipa taks force ida hodi elabora planu asaun no orsamentu.
Iha diskusaun ne’e, halibur ideia hosi partisipante sira kona-ba forma di’ak atu implementa Programa DIN ne’e.
Diskusaun téknika sei kontinua iha 22 outubru 2020 hodi nomea ekipa no finaliza planu asaun ho ninia orsamentu.
Jornalista: Natalino Costa
Editora: Julia Chatarina
