DILI, 04 novembru 2020 (TATOLI)–Governu liuhosi sorumutuk Konsellu Ministru (KM) delibera no aprova projetu ligasaun kabu submarinu ne’ebé liga hosi Austrália mai Timor-Leste.
“Sub-proposta Vise-Primeiru-Ministru no Ministru Planu no Ordenamentu, José Maria dos Reis, prosede ho projetu ligasaun dijitál Timor-Leste, liuhosi kabu submarinu fibra óptika, ne’ebé liga ba sidade sira iha Darwin no Port Hedland iha Commonwealth Austrália ne’e aprovadu iha Konsellu Ministru,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha Palásiu Governu, kuarta ne’e.
Portavóz Governu informa, ho aprovasaun projetu deliberasaun ne’e maka iha tempu oin mai parte Ministériu Planu no Ordenamentu inklui ministériu relevante sira hahú ona serbisu atu asegura ligasaun kabu submarinu.
Polítika dada kabu submarinu hosi Darwin mai Timor-Leste nu’udar prioridade Governu, ho kooperasaun Governu Canberra ho objetivu atu eleva kapasidade rede internét iha rai laran tanba VIII Governu Konstitusionál mós iha programa ba Governu eletróniku, ne’ebé atu realiza presiza iha liña internét ne’ebé lais.
Daudaun ne’e, banda internét internasioál ne’ebé iha ho kapasidade 6 Gigabyte/segundu, ne’ebé fahe ba populasaun iha territóriu tomak ne’ebé asesu ba internét liuhosi operadór Timor-Telecom, Telkomcel no Telemor.
Enkuantu, Governu liuhosi Ministériu Transporte no Komunikasaun aluga bandwith ho kapasidade 200 megabyte/segundu hodi fahe ba instituisaun Estadu sira hamutuk 140.
Governu iha ona planu atu atualiza husi kapasidade 200 megabyte ba 1 Gigabyte, atubele ajuda bainhira seidauk iha rede fibra ótika.
Jornalista: Antónia Gusmão
Editora: Julia Chatarina
