DILI, 06 novembru 2020 (TATOLI)—Xefe Departamentu Abastesimentu Água Munisípiu Dili, Francisco Pereira Xavier, hateten komunidade hosi parte Comoro kuaze loron tolu ona la asesu bee-moos tanba mákina ne’ebé uza hodi sukat tempu (parametru) aat tiha kauza hosi eletrisidade mate beibeik, nune’e distribuisaun bee-moos paradu.
Nia hatutan, Departamentu Abastesimentu Água Munisípiu Dili buka kedan meiu hodi rezolve preokupasaun komunidade liuhosi kontaktu direta parte tékniku, hodi hadi’a lalais parametru atu nune’e estasaun bee-moos iha Comoro bele funsiona fila-fali.
“Ita-nia komunidade hosi Suku Comoro ohin mai informa katak komesa horisehik to’o ohin loron seidauk bele asesu ba bee-moos tanba parametru mak aat ne’ebé kauza hosi ahi-mate no labele ense bee,” Francisco Pereira Xavier hateten ba Agência TATOLI iha nia knaar fatin Caikoli, Dili, sesta ne’e.
Nia esplika, bee-moos iha estasaun Comoro iha débitu 28 pur segundu, ho oras 24 nia laran hodi kobre área Comoro tomak.
“Maske la kobre hotu tanba kapasidade ne’ebé ki’ik, maibé ida-ne’e hanesan alternativu ida-ne’ebé ami bele oferese ba sira atu nune’e sira mós bele hetan bee ba sira-nia nesesidade,” nia hateten.
Nia hateten, bee ho débitu 28 litru pur segundu ne’e sufisiénte ona ba komunidade iha área Comoro ninia nesesidade.
“Populasaun barak maibé ida-ne’e ha’u bele dehan katak sufisiénte tanba ba nesesidade povu nian ita garante to’o hela. Ita mós iha bee estasaun bomba tolu mak iha ne’ebá. Ida maka iha Comoro A ne’ebé ho nia débitu 17 pur segundu, estasaun Comoro E ne’e 16 pur segundu no Comoro C estasaun bomba ida-ne’e ense ba iha Golgota. Hosi estasun tolu ne’e mak fornese mós ba populasaun iha Tasitolu no Raikotu,” nia hateten.
Jornalista: Osória Marques
Editór: Cancio Ximenes
