OÉ-CUSSE, 17 novembru 2020 (TATOLI)–Rejiaun Administrativa Espesiál Oé-cusse Ambeno (RAEOA) planea estabalese Unidade, Planeamentu, Monitorizasaun no Avaliasaun (UPMA) rejionál iha tinan 2021 hodi bele ajuda elaborasaun orsamentu bazeia ba programa ho di’ak no kualidade liután.
“Tinan oin atu kria unidade planeamentu, monitorizasaun no avaliasaun iha RAEOA, hanesan iha nasionál, maibé iha Oé-cusse UPMA rejionál,” Prezidente Autoridade RAEOA, Arsénio Paixão Bano hateten iha ámbitu formasaun tékniku kona-ba sistema jestaun finanseira ne’ebé hala’o iha salaun Aeroportu Internasionál Rota do Sândalo, tersa ne’e.
Kriasaun UMPA rejionál sei tama iha faze tranzisaun, ne’ebé sei kapasita tékniku sira hodi utiliza sistema no iha tinan 2022 bele uza ona sistema planeamentu ida di’ak.
“Tanba RAEOA iha tiha ona planu estratéjika rejionál, ne’ebé adapta ho planu estratéjiku dezenvolvimentu nasionál no planu ordenamentu territóriu, ne’ebé iha estudu barak no projetu barak maka ami halo ona,” nia akresenta.
Prezidente Autoridade ne’e dehan, tinan-lima ona maka autoridade serbisu maka’as konstrui infraestrutura bázika hodi hasai Oé-cusse hosi izolamentu hanesan konstrusaun aeroportu, estrada, inklui kria kondisaun ba portu.
Biban ne’e, Arsénio Bano enkoraja atoni-oan atu badinas serbisu no la gasta le’et de’it osan.
“Ha’u sempre ejize ema tenke serbisu maka’as, tanba ita kontente ona Oé-cusse iha kondisaun mínima iha zona sentrál Pante-Makassar ne’ebé di’ak tebes kompara ho munisípiu seluk, ne’ebé laiha razaun ema Oé-cusse la serbisu ou serbisu oituan de’it,” nia dehan.
Jornalista: Antónia Gusmão
Editora: Julia Chatarina
