DILI, 26 novembru 2020 (TATOLI)--Organizasaun Ai-han Mundiál (WFP, sigla inglés) apoia leptop haat no printer rua ba Ministériu Turizmu Komérsiu no Indústria (MTKI) hodi fasilita halo serbisu iha ámbitu implementasaun programa Cesta Bázika, liuliu ba produsaun voucher.
Vise-Ministru Turizmu, Komérsiu no Indústria, Domingos Lopes Antunes, hateten apoiu ne’e tuir pedidu ministériu.
“Ami simu apoia husi WFP, hanesan minitériu implementadór ba Cesta Bázika ba planu rekuperasaun ekonómiku. Apoiu ne’e, ha’u maka halo pedidu ba sira tanba buat barak maka presiza fasilita serbisu. Sira fó laptop 4 printer rua item kiik balun, ami husu liu tan ekipamentu laptop 10, projetór ho printer no ohin sira diponível balun,” Vise-Ministru Domingos Lopes iha edifísiu MTKI, Mandarin, kinta ne’e.
Tuir governante ne’e, ekipamentu hirak ne’e ba implementasaun voucher, tanba bainhira atu halo kontrola transasaun presiza ekipamentu eletróniku atu kontrola.
“Ami iha tablet husi Ministériu Finansa liuhosi Diresaun Jerál Estatísitika, agora haree ein termu produsaun voucher, atu uza aplikasaun, tanba ne’e sei uza iha loja,” nia akresenta.
Funsionáriu MTKI ida ka rua sei tuur iha loja no kada loja indikadu sei iha kasir ketak ba Cesta Bázika.
“Benefisiáriu barak, entaun uza laptop atu haree no verifika dadus informasaun pesoál,” nia fó hanoin.
Reprezentante WFP iha Timor-Leste, Dangen Liu, hateten WFP nia prezensa atu halo akordu kooperasaun atu apoia fasilidade.
“Sira halo pedidu mai no ami aseita, tanba ne’e ohin apoia ba implementasaun programa Governu,” nia dehan.
Nia dehan, parte WFP kontinua hatudu protidadaun hodi ajuda Governu Timor-Leste, hanesan ministériu ne’ebé presiza hodi hamutuk kontribui ba rekupersaun ekonómika iha rai laran.
Jornalista: Natalino Costa
Editora: Julia Chatarina
