DILI, 12 dezembru 2020 (TATOLI)—Líder Nasionál, Kayrala Xanana Gusmão, kumpre ona auto kuarentena loron 14, hafoin fila iha loron 28 novembru ba check up saúde iha ospitál Militár Gatot Soebroto, Sentrál Jakarta, Indonézia.
Bazeia ba rezultadu teste médiku, líder karizmátiku ne’e ho kondisaun di’ak no bainhira to’o iha Dili, tama kedan auto kuarentena iha ninia rezidénsia Balibar.
“Ohin maun Xanana termina ona auto karantina, nune’e bele fila hikas ona ba hela fatin atuál (Bidau Lecidere). Enkuantu rezultadu teste hatudu negativu ba COVID-19,” Kordenadora Jerál COVID-19 no atuál Diretora Jerál Ministériu Saúde, Odete da Silva Viegas, informa iha rezidénsia Xanana iha Balibar, sábadu ne’e.
Notísia Relevante: Xanana fila hikas mai Timór hafoin ‘check up’ rutina saúde
Koordenadora ne’e dehan, líder nasionál ne’e kumpre duni regra prevensaun surtu.
Hafoin Livre hosi auto Kuarantina, Xanana Gusmão ba asiste jogu finál Taxa 12 de Novembro entre ninia klube SLB ho Lalenok United.
Iha loron 28 novembru, líder nasionál ne’e to’o iha Aereoportu Internasionál Prezidente Nicolau Lobato iha tuku 13:37 ho aviaun Zet PK-YGR ne’ebé oferese hosi Indonézia.
Entertantu, ekipa ne’ebé akompaña mós livre ona hosi konfinamentu obrigatóriu hanesan Tomas do Rosário Cabrál, Jacinto Rigoberto, Elia Dos Reis Amaral, Alberto P. Carlos no Marcos da Silva.
Jornalista: Florêncio Miranda Ximenes
Editora: Julia Chatarina
