DILI, 14 dezembru 2020 (TATOLI)–VIII Governu Konstitusional liuhosi Ministériu Petróleu no Minerál (MPM) no Autoridade Nasionál Petróleu no Minerál (ANPM) aprova ona proposta empreza Santos Limited, kona-ba investimentu petrolífera fura mina-matan tolu iha kampu Bayu-undan.
Ministru Petróleu no Minerál, Víctor da Conceição Soares, informa hafoin analiza aspetu komersiál no tékniku, Governu no autoridade reguladór ANPM aprova ona pedidu investimentu ne’ebé tuir previzaun ho kustu millaun $200.
“Governu apoia tebes no aprova ona pedidu investimentu hosi empreza Santos atubele halo perfurasaun foun mina-matan tolu ne’ebé idetifikadu hodi hanaruk liután vida útil iha kampu Bayu-undan ba tinan-ida tan,” Ministru Víctor afirma iha Suai Room Timor Plaza, Dili, segunda ne’e.
Razaun aprovasaun proposta investimentu ne’e, tuir Ministru Víctor hodi bele aumenta reseita no produsaun petrolífera iha kampu Bayu-undan tanba kada tinan produsaun hahú menus.
ANPM no empreza Santos iha ona estudu ne’ebé hatudu iha potensialidade atu halo perfurasaun iha tinan oin atu aumenta reseita ba kofre estadu.
Iha biban hanesan, Prezidente ANPM, Florentino Soares Ferreira, hateten autoridade halo ona avaliasaun inísiu hosi parte komersiál no tékniku hodi empreza autraliana ne’e submete proposta investimentu ba perfurasaun mina-matan foun.
“Ami halo ona avaliasaun ba komersiál no tékniku, ne’ebé haree ba rezervatóriu ba kapasidade atu prodús. Ne’ebé haree ba parte téknika laiha problema no hosi komersiál sei fó reseita ba Estadu nafatin no ita sei la lakon,” nia akresenta.
Nune’e, ANPM hamutuk ho empreza Santos hahú koordena malu atu halo prosedimentu sira, nune’e iha jullu tinan oin (2021) bele hahú halo preparasaun.
Entretantu, Jerente Nasionál Empreza Santos, José Lobato Gonçalves, hateten maski Governu aprova ona proposta investimentu perfurasaun mina-matan tolu iha kampu Bayu-undan, maibé sei hein dezisaun ikus hosi board empreza Santos atu deside investimentu ne’e.
“Governu aprova ona maibé ita sei hein prosesu hosi empreza atu halo desizaun ba investimentu ne’e. Nune’e konsege no buat hotu la’o ho di’ak iha tinan oin atu hahú halo atividade baku mina-matan sira ne’e,” Jerente empreza Santos iha Timor-Leste hatutan.
José Lobato dehan, desde operadór petrolífera ConocoPhilips fa’an interese ba Santos, iha previzasaun ka istimasaun katak mina-matan ezistente iha Bayu-undan bele to’o de’it tinan 2022 produsuan hotu ona.
“Ita dehan istimasaun dala ruma dada naruk no bele menus, nune’e empreza Santos haree oportunidade atu baku tan mina-matan tolu, tanba ne’e bainhira konsege fura ita hetan mina-matan estimasaun bele to’o 2023,” nia esplika.
Santos nu’udar operadór foun Bayu-undan ne’ebé sosa partisipasaun Conocophillips, ne’ebé akumula 60% resin no mós sai operadór iha kampu petrolífera ne’e.
Iha loron 28 maiu 2020, Conocophillips finaliza ona prosesu fa’an ativu petrolífera ba empreza petrolífera australiana, Santos Limited, ne’ebé lokaliza iha Norte Austrália.
Durante ne’e, projetu Bayu-undan kontribui ona reseita ba Estadu Timor-Leste, ba fundu mina-rai hamutuk biliaun $20 resin.
Jornalista: Florêncio Miranda Ximenes
Editora: Julia Chatarina
