DILI, 18 dezembru 2020 (TATOLI)—Koordenadór COVID-19 husi Ministériu Saúde, Nilton da Silva, hateten sidadaun estanjeiru mane ida ho tinan 35 ne’ebé foinlalais identifika pozitivu COVID-19 sesta ne’e, alta ona husi Sala Izolamentu Sentru Saúde Vera-Cruz Dili tanba kondisaun saude rekuperadu.
Ekipa COVID-19 MS deskobre pasiente ne’e sofre coronavirus iha loron 1 fulan-dezembru 2020 hafoin halao ninia viajén husi Uganda bá Dubai iha loron 16 fulan-novembru, Dubai-Malázia iha loron 17 fulan hanesan.No iha loron 18 fulan-novembru viajén husi Malázia mai Dili Timor-Leste.
Notísia Relevante:MS deteta sidadaun estranjeiru ida ho COVID-19 pozitivu
“Iha loron 1 dezembru 2020 no hahú baixa Swab ne’ebé halo iha loron 09 dezembru 2020 rezultadu negativu Swab ba daruak iha loron 12 fulan-dezembru rezultadu pozitivu maibé iha loron 16 fulan-dezembru no loron 17 dezembru teste datolu no dahaat hatudu rezultadu negativu tanba ne’e mak hakarak deklara ba públiku katak pasiente refere sei alta iha loron ohin,’’ nia informa ba jornalista sira durante konferénsia imprensa, sesta ne’e iha Ministériu Saúde.
Mezmu rekupera hodi fila ona ba ninia uma, maibé pasiente ne’e sei nafatin halo auto-kuarentena durante loron 14 hodi hetan kontrola husi ekipa vijilánsia epidemolojia no mós kumpre medida preventiva seluk atu prevene transmisaun ba ema seluk.
”Dadus loron 17 fulan-dezembru 2020 totál númeru teste 15.573, hein rezultadu 363, totál kumulativu kazu 31, rekuperadu 31, no aumenta kazu provavél haat hamutuk 35 kazu foun laiha rezultadu negativu 15.179,’’ tenik tan.
Sidadaun ne’ebé ultrapasa fronteira ho dalan ileg’al durante fulan-novembru to’o loron 17 fulan-dezembru hamutuk 50, totál ema ne’ebé daudaun ne’e kumpre kuarentena obrigatóriu hamutuk 257, Dili iha ema na’in 196 no Munisípiu iha na’in 6.
Auto-kuarentena hamutuk ema na’in 165, iha Dili 147, Munisípiu na’in 18, pasa kuarentena durante loron 14 hamutuk ema na’in 6.784, Dili, 5.641 no Munisípiu 1.143.
Ministériu Saúde, reprezenta Governu husu ba Autoridade Lokál iha Fronteira Bobonaro, Covalima no Rejiaun Administrativa Espesiál Oe-Cusse Ambeno (RAEOA), atu kontrola komunidade tama no sai fronteira ho ilegál.
Notísia Relevante:Sidadaun Pakistaun ida hetan COVID-19 pozitivu
Jornalista : Felicidade Ximenes
Editór :Agapito dos Santos
