DILI, 28 dezembru 2020 (TATOLI)—Ekipa COVID-19 husi Ministériu Saúde (MS), iha segunda (28/12) deteta tan kazu konfirmadu COVID-19 ba ema na’in haat tanba ne’e totál kazu coronavirus iha Timor-Leste hamutuk 13.
Husi pasiente pozitivu COVID-19 ne’e, ema na’in tolu halo hela tratamentu saúde iha sala izolamentu Rejiaun Administrativa Espesiál Oe-Cusse Ambeno (RAEOA) no na’in 10 iha sala izolamentu Sentru Saúde Vera-Cruz Dili.
Notísia Relevante :MS deteta tan Timoroan na’in hitu hetan COVID-19 pozitivu
“Dahuluk mane ida ho idade 26, hatudu sintoma ho isin manas 38,6 grau, isin moras no kolen, Mane ida ho idade 35, laiha sintoma ruma,’’ Koordenadora Ekipa COVID-19, Ministériu Saúde, Odete da Silva Viegas, relata durante konferénsia imprensa iha salaun MS, Caicoli, ohin.
Pasiente mane ida seluk ho tinan 42 laiha sintoma, no sira-nia viajén husi UK iha loron 20 fulan-dezembru ho Qatar Airlines to’o iha Doha, depois tranzit husi Doha bá Malázia iha data hanesan ho Qatar Airlines no to’o iha Malázia iha loron 21 dezembru tuku 24:00 am oras Malázia.
Durante to’o iha Malázia pasiente hirak ne’e toba de’it iha Aeroporrtu Malázia nian no iha loron 22 fulan-dezembru husi Kuala Lumpur Malázia mai Timor-Leste ho Aviaun AirAsia.
No pasiente dahaat, sidadaun Pakistaun ida ho tinan 33, laiha sintoma.
“Ema Pakistaun ne’e halo viajén husi Pakistaun ba Doha ho Qatar Airlines, no kontinua ho Aviaun hanesan mai Malázia iha loron 21 fulan-dezembru no mai Dili ho Aviaun AirAsia iha loron 22 dezembru 2020,’’ nia esplika.
Iha parte seluk nia dehan iha loron 22 fulan-dezembru 2020, Aviaun AirAsia cancela viajén Timoroan na’in tolu husi Malázia mai Dili tanba deteta kona moras coronavirus no laiha dokumentu teste Polymerase chain reaction (PCR).
Kona-ba Timoroan ida ne’ebé konfirmadu COVID-19 iha Malázia, daudaun ne’e izola ona iha fatin izolamentu Nasaun ne’ebá nian.
“Daudaun ne’e izola hela iha izolamentu Malázia nian no na’in rua seluk ne’ebé laiha dokumentu husi teste Polymerase chain reaction (PCR) nian iha momentu ne’ebá deside kansela viajén ba kazu pozitivu ne’e no hirak ne’ebé laiha dokumentu rezultadu PCR tanba ne’e Timoroan nain tolu mak iha hela Malázia iha loron 22 dezembru 2020,” nia dehan.
Totál númeru teste COVID-19 16.324, hein rezultadu 297, totál komulativu kazu 44, rekuperadu 31, aumenta haat hamutuk 35, no kazu ativu 13, kazu foun haat, rezultadu negativu 15.886,
Totál kuarentena obrigatóriu hamutuk 349, iha Dili 279, Munisípiu 70, Auto-kuarentena hamutuk 136, iha Dili 129, Munisípiu hitu, pasa kuarentena loron 14, hamutuk 6.813, iha Dili 5.641, Munisípiu 1.172.
Notísia Relevante :Timoroan na’in rua hetan coronavirus
Jornalista :Felicidade Ximenes
Editór :Agapito dos Santos
