DILI, 04 janeiru 2021 (TATOLI)–Komisaun Organizadora (KO) ba tasa rotativa Komandante Nino Konis Santana 2020 no Komandu Polísia munisípiu Lautém, halo ona mediasaun ho klube FC Belta Trez no Loriko United atu partisipa jogu finál hafoin bele oferese tasa.
Tuir oráriu husi KO katak jogu finál entre klube rua ne’e realiza iha segunda (28/12), tuku 13:30 otl iha kampu futeból Titilari, maibé la konsege realiza, tanba klube FC Belta Trez la marka prezensa iha tempu realiza jogu ho razaun hakarak jogu finál hala’o iha kampu demokrasia Lospalos villa hodi hetan partisipasaun másima husi adeptu sira.
Enkuantu, klube Loriko United kumpre duni oráriu ne’ebé komisaun deside ona hodi ba hein FC Belta Trez iha kampu futeból Titilari.
Prezidente KO, Delcio da Costa Guimaraes, hateten molok jogu finál ne’e realiza, komisaun hamutuk ho polísia munisípiu Lautém halo ona mediasaun atu FC Belta Trez bele aseita partisipa jogu iha kampu ne’ebé deside ona, maibé laiha solusaun.
“Ami komisaun labele aseita tuir fali klube ida, tanba ami halo ona konvite ba nasionál no konvidadu seluk katak jogu finál realiza iha kampu futeból Titilari. FC Belta Trez rejeita partisipa, maibé ami nafatin kontinua atu fó tasa ba Loriko United tanba tuir regra jogu la partisipa ne’e walk over (W.O), maibé hahú mosu des-intendimentu entaun komandante Polísia munisípiu Lautém deside hapara entrega tasa ba Klube Loriko United hodi halo mediasaun”, Prezidente Komisaun Organizadora, Delcio da Costa Guimaraes, hateten ba Agência TATOLI via telefónika, segunda ne’e.
Tuir responsável ne’e, maski halo ona mediasaun maibé Loriko United hakarak entrega tasa ba Belta Trez maski jogu finál seidauk realiza ho razaun hakarak tasa ne’e kontinua kada tinan.
“Ami komisaun hili dalan klaran katak bainhira ita entrega tasa ne’e tenke iha jogu finál entre klube rua ne’e. Ne’ebé ami sei kontinua halo aprosimasaun ho klube rua ne’e no espera bele realiza jogu finál ne’e iha tempu badak”, Delcio akresenta.
Prezidente KO dehan, razaun halo mediasaun atu minimiza konflitu no des-intendimentu entre ekipa rua.
Bainhira iha aprosimasaun maka kontinua la simu malu, komisaun deside ona atu hapara tasa rotativa komandante Nino Konis Santana no lori tasa ne’e ba fundasaun memória Nino Konis Santana.
“Ami komisaun sei la aseita bainhira ekipa rua hakarak entrega tasa ne’e ba malu sein iha jogu finál, tanba jogu ne’e atu dignifika naran eroi sira, prepara no promove talentu juventude iha área desportiva, liuliu modalidade futeból”, nia hatutan.
Jogu tasa rotativa Komandante Nino Konis Santana 2020 ba-daruak, partisipa husi klube futeból hamutuk 61 ho objetivu dignifika naran eroi sira no promove talentu juventude munisípiu Lautém, liuliu iha modalidade futeból.
Atividade desportiva ne’e hetan apoia finanseira husi Sekretaria Estadu Juventude no Desportu ho montante $4000, osan ba inskrisaun hosi kada klube $100 no apoiu seluk hanesan tasa no medalla ba mellór jogadór, mellór guarda rede, mellór markadór no mellór klube.
Mesmu jogu finál parte KO seidauk marka data no fatin, maibé parte KO halo ona serimonia fahe prémiu ba terseiru lugar mak klube Jona L.N no mós ba sira ne’ebé tama iha mellór jogadór, mellór guarda rede, mellór markadór no mellór klube, iha loron 28 dezembru 2020 liubá iha kampu Titilari.
Ba asuntu ne’e, Agência TATOLI tenta konfirma ba responsável klube rua maibé seidauk hetan konfirmasaun.
Jornalista: Florêncio Miranda Ximenes
Editora: Julia Chatarina
Ho atividade ida deit mak osan boot hanesan n ami bele halo seremonia rspesial ida heroi no atu halo mos refleksaun no bele mos convida ema sira ne’ebé servisu ho nia antes comandante lakon vida atu ita jerasaun foun lembra nafatin.
ho osan ne’ebé boot maibe atividade ida deit no la iha buat foun ida mak mosu husi atividade ne’e.