DILI, 06 janeiru 2020 (TATOLI)—Ministra Saúde (MS), Odete Maria Freitas Belo, hateten iha tempu badak sei aprezenta ba Konsellu-Ministru, kona-ba planu sosa ai-moruk AstraZeneca hodi halo vasinasaun ba komunidade para prevene transmisaun COVID-19 iha Timor-Leste.
Nia dehan, bainhira ai-moruk ne’e to’o ona mai rai-laran, Ministériu Saúde sei vasina uluk ba ekipa liña frente hanesan profisionál saúde, profesór, Servisu Alfãndega, Polisia Nasionál Timor-Leste (PNTL), FALINTIL-Forsa Defeza Timor Leste (F-FDTL) no mós pasiente sira ho moras diabetes, tubercoluse.
Notísia Relevante :Prevene COVID-19, TL sei implementa vasina AstraZeneca ba ema hotu
“Ha’u sei aprezenta ba iha konsellu Ministru tuir mai,” Governante ne’e informa ba jornalista sira hafoin partisipa reuniaun Konsellu-Ministru, kuarta ne’e, iha Palacio do Governo Dili.
Tuir planu Governu Timor-Leste sei aloka orsamentu pursentu 80 no parseiru dezenvolvimentu sira hanesan Organizasaun Mundiál Saúde (OMS), Governu Austrália no seluk tan sei apoiu 20 %.
Nia haktuir Servisu Autónomu Medikamentu no Ekipamentu Saúde (SAMES) Kampung-Alor Dili, mak sei halo armazenamentu ba ai-moruk vasina AstraZeneca bainhira importa ona mai Timor-Leste.
“Vasina ne’e iha oin tolu maibé ita presiza mak vasina AstraZeneca tanba haree ba ita-nia kondisaun no ita mós haree ba zelera tanba vasinasaun ne’e rai iha temperatura ne’ebé mak kiik entaun ita foti vasina ne’e tanba haree tuir temperatura ita-nian mak hafoin hola,’’ nia hateten.
Governante ne’e dehan katak, Ministériu Saúde, sei estabelese ekipa servisu ida ho liña ministeriál hodi implementa programa vasina ne’e iha futuru.
Jornalista :Felicidade Ximenes
Editór:Agapito dos Santos
