DILI, 10 janeiru 2021 (TATOLI)—Traballadór timor-oan ida naran Tomas Pereira ho idade 25 husi munisípiu Bobonaro (hela iha Dili), hakotu iis tanba asidente ho karreta, iha domingu dader iha Tasmánia, Austrália.
Traballadór ne’e husi Seasonal Worker Programme (SWP) tinan 2019 no serbisu iha kompañia Tasmanian Berries.
Diretór Nasionál Empregu Esteriór, Filomeno Soares, husi Sekretaria Estadu Formasaun Profisionál no Empregu (SEFOPE), konfirma hetan ona informasaun maibé seidauk bele divulga detallu tanba seidauk hatene kronolojia loloos.
“Nia mate ona maibé ita seidauk hatene kronolojia loloos, kronolojia mate ne’e iha hela faze investigasaun maibé informasaun preleminár dehan asidente ho karreta baku fila, maibé ita seidauk hatene asidente tanba saida?,” Diretór Nasionál ne’e informa ba Agência TATOLI, via telefónika, domingu ne’e.
Notísia Relevante: Traballadór timor-oan 152 aranka ona bá Austrália
Kona-ba asidente iha oras serbisu, tuir Filomeno seidauk hetan informasaun klaru.
“Ne’e la loos, tanba nia sai kalan boot ne’e la’ós ona ba serbisu, investifikasaun mak justifika katak nia hetan azar ne’e iha oras serbisu ka hafoin oras serbisu, tanba kuandu iha oras serbisu ne’e liga ho seguransa sosiál, tanba ne’e presiza fó informasaun loloos,” nia dehan.
Sekretaria Estadu ne’ebé hanesan responsável ba SWP sei konvoka enkontru ho família vítima.
“SEFOPE aban sei halo enkontru ho família no hein informasaun husi Embaixadór no Koordenadór husi Austrália,” nia akresenta.
Tuir dadus SEFOPE, husi tinan 2014 to’o 2018, timor-oan hamutuk 2.819 maka serbisu ona iha Austrália liuhosi SWP iha área ospitalidade no ortikultura no konsege rekolla retornu milliaun $9.698.579,15 mai Timor-Leste.
Iha tinan 2012 traballadór hamutuk 12, tinan 2013 traballadór na’in-36, 2014 ema na’in-131, 2015 na’in-181, 2016 iha traballadór na’in-298, 2017 na’in-782, 2018 ema na’in-1.380 no 2019 ema lima.
Iha área ortikultura traballadór mane hamutuk na’in-1.823 no feto 744, enkuantu iha ospitalidade mane 187 no feto 95, ne’ebé husi númeru ne’e traballadór balun serbisu repetidu to’o dala-haat hafoin kompleta serbisu ho durasaun fulan-neen, bazea ba prestasaun serbisu traballadór iha kompañia sira.
Iha loron 02 dezembru 2020, traballadór timor-oan na’in-152 husi SWP aranka ba Tasmánia, Austrália.
Jornalista: Natalino Costa
Editora: Julia Chatarina
