DILI, 18 janeiru 2021 (TATOLI) – Federasaun Karate-Do Timor – Leste (FKTL), hetan konvite husi federasaun internasionál hodi partisipa iha liga internasionál Karate-Do nian tanba ne’e nia atleta sira preparadu.
“Ita hetan ona konvite hosi federasaun internasionál hodi ba partisipa iha liga internasionál Karate-Do nian; iha seniór no juniór nian no atividade seluk tan. Maibé, ita seidauk serteza atu partisipa. Kona-ba ita-nia atleta sira preparadu hotu ona kuandu Covid-19 laiha ona ita bele aranka, maibé ami seidauk bele fó sai loloos tanba sei iha prosesu nia laran,” Sekretáriu Jerál FKTL, António Carlos Araújo ba Agência Tatoli iha nia knaar fatin Jináziu Dili, ohin.
Tuir nia, kada tinan, sira sempre iha planu ba atividade Karate-Do nian, maibé iha tinan ida ne’e atividade hotu provizóriu sei suspende tanba Estadu emerjénsia ne’ebé Estadu mak hasai no tenke kumpri katak labele hala’o atividade ema na’in 10 ba leten.
Sekretáriu Jerál FKTL ne’e informa mós katak atividade atletizmu Karate-Do ne’e iha nível nasionál hanesan kampionatu nasionál dadauk ne’e hato’o ona proposta ba Sekretariu Estadu Juventude no Desportu (SEJD).
Entretantu, dadauk ne’e tuir dadus ne’ebé rezistu iha FKTL atleta junior hamutuk na’in 60 resin no senior mós 60 resin. Atleta hirak ne’e mak prepara ona atu ba partisipa iha eventu internasionál sira hodi reprezenta Timor – Leste.
Karate-Do ne’e nu’udar Arte Marsiál ida husi illa Okinawa, iha Japaun. Téknika sira kompostu husi Karaté modernu, ne’ebé mak nia orijen mai husi fonte oioin, liliu mistrura entre luta nativa husi povu Okinawa ho Kun Fu, ne’ebé mak pratikadu liu husi komunidade xinés parte sul.
Notísia relevante:Karatedo Submete Ona Proposta ba SEJD Realiza Kampionatu Nasionál
Jornalista: Hortencio Sanchez
Editór: Rafy Belo
