DILI, 21 janeiru 2021 (TATOLI)--Prezidente Repúblika (PR), Francisco Guterres ‘Lú Olo’, husu Governu atu kontinua mantein seguransa iha fronteira terrestre no sensibiliza sidadaun atu nafatin kumpre medida prevensaun hosi Ministériu Saúde (MS) hanesan uza máskara, distánsia sosiál, no fase liman bebeik, atu impede kontájia moras COVID-19.
“Prezidente Repúblika apoia maka’as loos no husu atu Governu tau matan nafatin asegura iha área fronteira terrestre no sensibiliza sidadaun sira tuir regra sira ne’ebé Ministériu Saúde fó tanba sira-nia moto rasik maka saúde iha ita-nia liman rasik, maibé se ita la tau matan ba ita-nia an maka bele fó risku ba vida,” Primeiru Ministru (PM), Taur Matan Ruak, hateten hafoin enkontru semanál ho Xefe Estadu iha Palásiu Prezidensiál, Bairro Pité, kinta ne’e.
Biban ne’e, PR apoia desizaun Governu liuhosi Konsellu Ministru ne’ebé delibera hodi halo renovasaun Estadu Emerjénsia (EE) da-sanulu, ba períodu loron-30.
“Iha dezembru 2020 ita iha kazu konfirmadu 15 no horisehik tun mai lima, hafoin lorokraik aumenta fali ida, ne’ebé ita iha kazu neen ona mak pozitivu,” Xefe Ezekutivu informa.
PM enkoraja sidadaun hotu atu koopera ho entidade responsável kombate surtu globál atu prevene kontájia COVID-19.
Bazeia ba dadus hosi Ministériu Saúde (MS), iha loron 20 janeiru 2021 totál komulativu teste 18.111, hein rezultadu 280, komulativu kazu 53, rekuperadu 47 aumenta haat hamutuk 51, kazu foun ida no atuál baixa na’in neen.
Rezultadu teste negativu 17.778, totál kuarentena 223, kompostu hosi Dili 137 no munisípiu 86, enkuantu ba auto-kuarentena hamutuk 101, kompostu hosi Dili 97 no munisípiu haat.
Ema ne’ebé pasa ona kuarentena loron 14 hamutuk 7.331, kompostu hosi Dili 6.070 no munisípiu 1.261.
Enkuantu, to’o oras ne’e iha Timor-Leste seidauk rejista ema mate tanba COVID-19 no kazu konfirmadu ne’ebé mosu iha Timór hanesan kazu importadu.
Maski seidauk rejista transmisaun iha komunidade, maibé Governu liuhosi MS kontinua aplika regra rigór tanba númeru kazu iha nasaun viziñu aumenta ba bebeik.
Timor osidentál, Indonézia ne’ebé besik ho pontu entrada Terrestre ho Timor-Leste, to’o oras ne’e rejista ona kazu konfirmadu hamutuk 3.152, rekuperadu 1.759 no mate 90.
EE faze da-siak abranje iha territóriu nasionál tomak, hahú vigora hosi tuku 00;00 loron 03 janeiru 2021 no sei termina tuku 23: 59 loron 01 fevereiru 2021.
Jornalista: Florêncio Miranda Ximenes
Editora: Julia Chatarina
