DILI, 21 janeiru 2021 (TATOLI)— Ministériu Saúde (MS), liuhosi koordenadór pilár hitu COVID-19, Nilton da Silva, klarifika sidadaun Indonézia ida ne’ebé pozitivu COVID-19 no anúnsia iha loron 20 janeiru tinan ne’e, hetan tratamentu hanesan diplomata, tanba mai ho pasaporte diplomata.
Klarifikasaun ne’e Ministériu Saúde halo atu responde ba preokupasaun hosi públiku iha mídia sosiál kona-bá informasaun ne’ebé antes ne’e ministériu rasik anúnsia kazu pozitivu COVID-19 iha Timor-Leste hanesan diplomata ida.
Notísia Relevante:Diplomata ida hosi Indonézia pozitivu COVID-19
Embaixada Indonézia iha Timor-Leste, iha loron 21 fulan janeiru 2021, fó sai karta komunikadu ida ba redasaun Agência Tatoli, hodi klarifika notísia ne’ebé Tatoli públika iha loron 20 janeiru ho títulu “Diplomata ida hosi Indonézia pozitivu COVID-19”.
“Pasiente pozitivu Covid-19 ne’e la’ós diplomata Indonézia. Ema-ne’e staf administrasaun, la’ós diplomátiku (penderita positif Covid-19 dimaksud bukan diplomat Indonesia. Yang bersangkutan adalah staf administrasi non-diplomatik)”, embaixada Indonézia nia karta klarifikasaun ho nota komunikadu ne’ebé dirije ba Tatoli.
Ministériu Saúde liuhosi komisaun nasionál ba prevensaun COVID-19 konsidera sidadaun ne’e hanesan diplomata, tanba Governu simu sidadaun ne’e hodi tama mai TL bazeia ba pedidu hosi embaixada Indonézia nian iha Dili.
“Sim, informasaun ne’ebé ha’u simu hosi ekipa vizilánsia katak, sidadaun Indonézia ne’e tama mai territóriu Timor-Leste ho pasaporte diplomata”, Doutór Nilton hateten ba jornalista Agência Tatoli, liuhosi telefónika, kinta ne’e.
Nia hatutan tan: “Seluk tan mak durante fronteira terrestre taka, sidadaun ne’ebé mak uza pasaporte diplomata mak bele tama no sira tama Timor ho pedidu hosi embaixada Indonézia nian, tanba ema hirak ne’e Governu konsidera hodi hetan tratamentu hanesan diplomata”.
Entretantu, despaixu Governu númeru 0004/MI/2021 kona-bá prolongamentu periúdu enseramentu postu fronteira terrestre nian, ho nia validasaun to’o loron 24 fulan janeiru, iha artigu lima hateten, pedidu sira kona-bá sirkulasaun internasionál tenke aprezenta hosi interresadu sira ne’ebé hala’o hela missaun diplomasia no konsuladu sira Repúblika Demokrátika Timor-Leste nian.
Jornalista: Felicidade Ximenes
Editór: Cipriano Colo
