DILI, 28 janeiru 2021 (TATOLI)–Deputada Domingas dos Santos hosi Munisípiu Bobonaro mak substitui temporária saudozu deputadu Sabino Soares “Guntur”.
Deputada Domingas dos Santos moris iha loron 21 marsu tinan 1959 iha munisípiu Bobonaro. Durante ne’e asume kargu Jerente PRADET iha Munisípiu Bobonaro.
Vise-Xefe Bankada Partidu Libertasaun Popular (PLP), Deputadu Francisco de Vasconcelos, hateten desizaun foti bainhira Deputadu Guntur sei enfrenta moras iha Hospital Nacional Guido Valadares (HNGV).
“Nia dezde iha HNGV ami halo subtituisaun tanba tuir lista eleitorál señora Domingas dos Santos mak substitui matebian nia fatin,” nia informa ba jornalista sira iha resintu Parlamentu Nasionál, kinta ne’e.
Nia dehan, ne’e subtituisaun temporária bazea ba desizaun partidu nian.
“Depois ne’e mak partidu haree fila-fali, bele mantein ka ema seluk maibé ne’e depende ba señora Domingas, sé nia lakohi entaun lista seluk tama,” nia dehan.
Nia hatutan, substituisaun temporária ne’e tanba partidu foti desizaun bazea Deputadu Guntur nia kondisaun saúde.
“Agora nia laiha ona entaun depois prosesu funebre hotu mak haree fali. Kuandu partidu deside definitivu ona entaun sei haruka karta ba parlamentu katak subtituisaun definitivu mak ne’e,” Vise-Xefe Bankada PLP ne’e esplika.
Entretantu, Deputada Domingas dos Santos, prontu substitui no promete sei haklaken lian povu nian iha Parlamentu Nasionál.
“Ha’u prontu substitui saudozu nia fatin no ha’u deside ona husik kna’ar nu’udar Jerente PRADET nian iha munisípiu Bobonaro,” Deputada Domingas hateten.
Deputada Domingas fofoun tuur kadeira reprezentante foka asuntu dahuluk mak propoin Ministériu Edukasaun, Juventude no Desportu (MEJD) atu hamosu lei ida hodi regula farda ba eskola hotu-hotu iha territóriu nasionál.
Notísia Relevante: PN husu MEJD hamosu Lei regula farda ba Ensinu Primária-Sekundária
Jornalista: Evaristo Soares Martins
Editór: Cancio Ximenes
