DILI, 29 janeiru 2021 (TATOLI) – Governu Malázia apoiu máskara hamutuk rihun 70 mai Timor-Leste hodi prevene pandemia Covid-19.
Liuhosi serimónia entrega apoiu máskara ne’ebé hala’o iha Edifísiu MNEK, sesta ne’e, Vise-Ministru Negósiu Estranjeiru no Kooperasaun (VMNEK), Julião da Silva, lori governu Timor-Leste nia naran agradese Governu Malázia ne’ebé foin dauluk apoiu Timor-Leste hodi prevene Covid-19.
Iha fatin hanesan Embaixadóra Malázia iha Timor-Leste, Sarimah Akbar hateten apoiu ne’e fó ba povu Timor-Leste atu prevene an hosi Covid-19 tanba haree ba númeru surtu ne’e agora sa’e maka’as iha mundu.
“Ajuda ne’e fó atu komunidade sira bele uza hodi prevene an nafatin hosi Covid-19,” Embaixadóra Sarimah Akbar hateten.
Defende TL nia adezaun ba ASEAN
Iha biban ne’e, Embaixadóra Sarimah Akbar hateten Governu Malázia nafatin apoiu no defende Timor-Leste atu adere ba ASEAN.
“Ami apoiu tebes Timor-Leste atu tama ba ASEAN, liuhosi ami nia ajuda oinsá reforsa iha dezenvolve rekursu umanu no seluk tan atu Timor-Leste bele tama duni ba ASEAN,” nia hateten.
Jornalista : Hortencio Sanchez
Editór : Francisco Simões
