DILI, 01 fevereiru 2021 (TATOLI)—Ministériu Saúde (MS) rekoñese katak, durante periúdu Estadu Emerjénsia (EE) iha situasaun surtu COVID-19, produtu iha Serbisu Autónomu Medikamentu no Ekipamentu Saúde (SAMES) menus, tanba fronteira taka.
”Ai-moruk menus duni iha situasaun COVID-19 no SAMES esforsu hodi halo aprovizionamentu, maibé medikamentu sira atu tama ne’e mak iha difikuldade boot tanba ema taka fronteira,” Vise-Ministru Saúde Bonifácio ‘Maucoli’ dos Reis, ba jornalista Agência Tatoli iha salaun MS Caicoli, segunda (01/02).
Kona-bá mekanizmu distribuisaun ai-moruk, governante ne’e esplika, durante ne’e parte ospitál no klínika sira sempre hato’o pedidu ba Diresaun Nasionál Farmásia hodi kanaliza ba SAMES, no kanaliza liu tan ba iha armajenamentu rejionál sira hanesan Baucau no Ainaro hafoin bele distribui.
Antes ne’e diretora armajenamentu SAMES, Saturlina Ximenes, hateten produtu hotu-hotu ne’ebé iha armajenamentu menus ona to’o pursentu 53.
Produtu sira ne’ebé menus mak hanesan, estoke medikamentu, konsumíveis, laboratóriu no mós produtu ba item espesialidade sira.
Produtu hirak ne’ebé menus ona liu-liu medikamentu, SAMES sosa iha tinan 2018, 2019 no 2020.
Notísia Relevante:Produtu iha SAMES menus 53%
Jornalista: Felicidade Ximenes
Editór: Cipriano Colo
