Xefe Governu apresia progresu dezenvolvimentu Portu Baía Tibar
DILI, 08 fevereiru 2021 (TATOLI)–Primeiru-Ministru (PM), Taur Matan Ruak, hamutuk ho membru Governu relevante, hala’o vizita ba konstrusaun Portu Baía Tibar, hodi haree progresu konstrusaun, ne’ebé tuir planu sei ramata iha maiu 2022.
Molok Xefe Governu vizita obra ne’e, rona uluk aprezentasaun badak relasiona ho progresu projetu konstrusaun husi ekipa tékniku sira.
Hafoin halo observasaun, PM dehan projetu ne’e tinan oin tenke entrega ba Governu tanba ne’e ministériu relevante sira haree preparativu saida mak presiza halo.
“Nune’e molok entrega ba Governu buat hotu prontu no bele ajuda funsionamentu operasionalizasaun. Ha’u la’ós enjeñeiru maibé kontente loos ho dezenvolvimentu tinan ne’e, iha tinan kotuk ha’u mai seidauk akontese buat ida maibé agoora oin seluk ona, entaun hanesan parseiru hakarak obra ne’e tenke la’o ho di’ak nune’e bele kumpre tempu atu ramata,” PM Taur hateten hafoin observa direta projetu konstrusaun ne’e iha terrenu iha suku Tibar, postu administrativu Bazartete, munisípiu Liquiçá, segunda ne’e.
Tuir dirijente Timor Port, daudaun progresu serbisu atije ona 45%, ne’ebé aterra rai hotu ona no agora kontinua baku ponte kais, hahú halo uma, edifísiu no armazen sira inklui instala mákina hiit kontentór sira.
Notísia relevante: Konstrusaun Portu Baía Tibar atinje ona 42%
Antes ne’e, Diretór Ezekutivu Timor Port S.A, Rafael Ribeiro, hateten situasaun pandemia COVID-19, halo movimentasaun limitadu ne’ebé fó impaktu ba tékniku sidadaun estrajeiru husi sub-kontratór Xina Harbour atu mai Timór hodi halo atividade no difikulta mós hatama ekipamentu sira.
Maibé nia dehan, Timor Port no sub-kontratór sira konsege kontinua konstrusaun tanba traballadór hamutuk iha 1.000-resin husi estranjeiru no timor-oan kontinua atividade konstrusaun.
Tuir planu, bainhira laiha COVID-19, projetu konstrusaun ne’e finaliza ona iha agostu tinan ne’e no inaugura hodi halo operasaun, maibé tanba situasaun atuál, konstrusaun la’o tarde oituan no Governu prolonga tan durasaun serbisu ba tinan 2022.
Daudaun, orsamentu ba investimentu husi Governu Timor-Leste no Timor Port inklui Bolloré hamutuk millaun $100 no sei kontinua investe tinan ne’e hodi hala’o atividade konstrusaun ho másimu.
Projetu konstrusaun ho nível internasionál ne’e, ezekuta husi Timor-Port S.A ho suporta husi sub-kontratór sira, ho modalidade Parseria Públiku Privada (PPP).
Ba konstrusaun ne’e, Governu aloka millaun $130, enkuantu Timor Port no Bolloré hamutuk millaun $140, ne’ebé totál millaun $270 ba faze inísiu.
Nune’e, totál investimentu orsamentu ba Portu Tibar to’o tinan 30 ho valór millaun $500-resin.
Iha vizita akompaña mós husi membru Governu sira hanesan Vise Primeiru-Ministru no Ministru Planu no Ordenamentu, José Maria dos Reis, Ministériu Obra Públika, Salvador Eugênio Soares dos Reis Pires, Vise-Ministériu Obra Públika, Nicolau Freitas Belo, Ministru Koordenadór Asuntu Ekonómiku, Joaquim Amaral, Ministru Finansa, Rui Augusto Gomes.
Nune’e mós, Ministru Asuntu Parlamentár no Komunikasaun Sosiál, Francisco Jerónimo, Ministru Justisa, Manuel da Costa Cárceres, Ministru Transporte no Komunikasaun, José Agustinho da Silva, no Ministru Turizmu, Komérsiu, no Indústria (MTKI), José do Carmo da Silva.
Jornalista: Antónia Gusmão
Editora: Julia Chatarina
