DILI, 09 fevereiru 2021 (TATOLI)–Ministériu Obra Públiku (MOP) liuhosi Diresaun Nasionál Aprovizionamentu (DNA) sei envolve Organizasaun Internasionál Traballu (ILO, sigla inglé) inklui Servisu Obra Públika munisipál sira atu garante transpárasia iha konkursu públiku ba projetu estrada rurál.
MOP-DNA loke konkursu públiku projetu estrada rurál munisípiu haat hanesan Manatuto, Lautém, Ainaro no Baucau.
Diretór Nasionál Aprovizionamentu MOP, Quintiliano Belo, hateten daudaun prosesu konkursu públiku projetu estrada rurál munisípiu haat iha ona kolesaun dokumentu husi empreza lokál sira ne’ebé mak kompete, maibé úniku munisípiu Aileu mak kahur malu entre nasionál no restristu, depende ba montante orsamentu kada projeitu.
“Hahú husi fornese bidding document, site visit no evaluasaun rasik envolve ekipa tékniku ILO inklui Diretór Obra Públika munisípál sira atu garante transparánsia iha konkursu públiku ba projetu estrada rurál,” Diretór Quintiliano Belo, informa ba Agência TATOLI iha ninian knaar fatin, Caicoli, tersa ne’e.
Notísia relevante: MOP loke ona konkursu públiku projetu estrada rurál munisípiu haat
Tuir Diretór ne’e, rekezitu ba projetu estrada rurál la kompleksu, maibé importante mak empreza ne’e tenke husi munisípiu la’ós empreza nasionál, tanba rekezitu ne’e tuir Lei Rejime Jurídiku Aprovizionamentu númeru 10/2005.
Tanba ne’e, MOP-DNA fó ona oportunidade ba empreza lokál sira de’it mak bele kompete.
Rekizitu importante seluk ba empreza sira mak ninia konta labele mamuk no tenke iha cash purvolta 25% husi totál orsamentu projetu ne’ebé kompete.
Aleinde ne’e, empreza presiza halo deklarasaun garante finanseiru (bank declaration performance) 10% iha banku durante ou sai vensedór ba projetu, enkuantu ba ekipamentu pezadu sira ladún presiza.
“Rekezitu todan liu laiha, maibé orientasaun Ministru Obra Públika, maka hahú tinan 2018 to’o agora, Governu nia polítika mantein hela, katak projetu hotu loke ba públiku no laiha projetu markadu, empreza prenxe rekezitu mak bele sai vensedór,” nia esplika.
MOP-DNA hein hela nafatin verifikasaun prévia Ajénsia Dezenvolvimentu Nasionál (ADN) ba munisípiu sira seluk
“Hirak ne’ebé halo ona konkursu públiku ona, ninia implementasaun depende ba evaluasaun, tarde liu fulan-abríl no planeia ona iha fulan-maiu sei hahú serbisu iha terrenu,” Quintiliano akresenta.
Traballadór ne’ebé envolve ba projetu estrada rurál, MOP no ILO foku ba ema iha kada munisípiu, liuliu feto sira, nune’e loke kampu serbisu ba timor-oan sira área rurál.
Nia dehan, kona-ba estrada urbana no nasionál, projetu barak liu aloka iha verba fundu infrastruktura, ne’ebé kada ministériu haree de’it mak manutensaun kiik sira ho kondisaun afeta komunidade sira.
Tinan ne’e, Governu sei reabilita estrada rurál hamutuk kilómetru 291 no iha fundu infraestutura mós sei reabilita estrada munisípál kilómetru 380, estrada urbanu kilómetru 149 no estrada nasionál kilómetru 49.
Iha tinan ne’e, orsamentu ba MOP hamutuk $240,673,539, ne’ebé foku ba dezenvolvimentu, konstrusaun, reabilitasaun, manutensaun no jestaun estrada, ponte no kontrolu Cheia ho montante $25,159,778, ne’ebé ekivalente 10,5% husi totál Orsamentu Jerál Estadu.
Jornalista: Florêncio Miranda Ximenes
Editora: Julia Chatarina
