DILI, 19 fevereiru 2021 (TATOLI)—Koordenadór forsa tarefa prevensaun no mitigasaun surtu COVID-19 Sentru Integradu Jestaun Krize (CIGC sígla Portugés), Rui Maria de Araújo deklara katak atualizasaun dadus sei hala’o hikas iha Centro Convenções Dili (CCD) hahú loron 19 fevereiru.
“Ita sei atualiza dadus COVID-19 iha CCD tanba iha loron 1 fevereiru Primeiru Ministru foti ona desizaun atu re-ativa hikas Sentru Integradu Jestaun Krize,’’ Rui Maria de Araújo hateten ba jornalista sira iha CCD, kinta ne’e.
Notísia Relevante:MS rejista kazu pozitivu COVID-19 ida, na’in 18 rekoperadu
Nia mós fó hanoin katak, númeru kazu pozitivu COVID-19 ne’ebé deteta iha Timor-Leste ne’e kazu importadu no to’o ohin loron seidauk iha transmisaun lokál, tanba ne’e Governu liuhosi Minsitériu Saúde implementa vizilánsia sentinela ho mekanizmu atu deteta sedu.
“Hosi fulan abril 2020 to’o loron 17 fevereiru 2021, vizilánsia sentinela ne’e hala’o iha Munisípiu no Ospitál Referál sira ho totál 8.096 amostra,” nia subliña.
Rui Araújo konsidera númeru ne’e fó duni justifikasaun katak, Timor-Leste halo prevensaun sedu tanba laiha pozitivu no maioria negativu.
Sentru Integradu Jestaun Krize iha CCD funsiona hahú fulan marsu 2020, iha fulan juñu integra ba Ministériu Saúde no hahú ohin sei funsiona hikas hodi halo atualizasaun ba dadus COVID-19.
Jornalista: Felicidade Ximenes
Editór: Cipriano Colo
