DILI, 26 fevereiru 2021 (TATOLI)–Ministru Koordenadór Asuntu Ekonómiku, Joaquim Amaral, Ministru Turizmu, Komérsiu no Indústria, José Lucas do Carmo da Silva, no Ministru Agrikultura no Peska, Pedro dos Reis, asina despaisu hodi estende períodu distribuisaun Cesta Básica durante fulan ida tan.
Antes ne’e, distribuisaun Cesta Bázika faze dahuluk hahú novembru to’o dezembru 2020, iha faze tuir mai kontinua hosi janeiru no ramata iha 28 fevereiru 2021, nune’e faze tuir mai ministériu implementadór sira estende to’o 31 marsu.
Ministériu implementadór ba distribuisaun Cesta Bázika mak hanesan Ministériu Turizmu, Komérsiu no Indústria (MTKI) atinje ona, Sekretariu Estadu Kooperativa (SEKoop), Ministériu Agrikultura no Peska (MAP), no Sentru Lojístiku Nasionál (CLN, sigla portugés) inklui Sekretaria Estadu Ambiente (SEA).
“Daudaun programa Cesta Básiza distribui ona ba populasaun hamutuk 900.000 no sei falta 595.000,” refere nota ne’ebé Agência TATOLI asesu iha sesta ne’e.
Programa Governu kurtu prazu iha ámbitu rekuperasaun ekonómika ne’e, nu’udar medida restrisaun iha luta kontra surtu COVID-19, hodi salva no proteje funsionamentu ekonomia rai-laran.
Ho objetivu hodi kria kondisaun liuhosi aumenta rendimentu agrikultór, inklui apoia família ho nesesidade bázika hodi kombate hamlaha liuhosi kontribuisaun alimentar ne’ebé iha nutrisaun ba uma kain hotu iha Timór laran.
Medida apoiu família sira liuhosi programa Governu, ho ninia perspetiva hodi estímulu ekonomia rai laran ba períodu kurtu prazu, bazeia ba dekretu-lei númeru 48/2020, 07 outubru kona-ba adota medida apoiu família liuhosi atribuisaun Cesta Bázika hosi operadór ekonómiku lokál sira iha ámbitu planu rekuperasaun ekonómika.
Jornalista: Antónia Gusmão
Editora: Julia Chatarina
