DILI, 09 marsu 2021 (TATOLI) – Adjuntu Sekretáriu Jerál Federasaun Futeból Timor – Leste (FFTL), Frederico Martins, informa jogu entre ekipa ba play off AFC Cup kontinua hala’o maske iha situasaun pandemia Covid-19. Tanba ne’e klube Timor – Leste nian reprezenta hosi Lalenok United FC sei kontra klube Cambodia Visakha FC iha Singapura, iha fulan abríl 2021.
Notísia Relevante : FFTL entrega sertifikadu AFC Cup bá Lalenok United FC
Nia klarifika katak, loloos jogu ba klube rua ne’e sei halo iha Cambodia, maibé iha nasaun refere laiha konfinamentu obrigatóriu loron 14 ba jogadór sira, nune’e ekipa AFC deside hodi muda ba hala’o iha Singapura.
“Lalenok United nia jogu ba play off AFC Cup nian kontinua halo tanba buat hotu fiksu ona no fasilidade hotu AFC mak haree. Kona-ba aviaun atu ba ne’e maka ami sei bolu klube tuur-hamutuk hodi ko’alia,” Frederico Martins , informa ba Agência Tatoli, tersa ne’e, liuhosi mensajen WhatsApp.
Iha jornada AFC Cup ne’e, Lalenok United FC iha direitu atu hetan subsídiu $40,000.00 hosi AFC ba fasilidade hotu hodi partisipa iha jogu refere. Klube ne’ebé sei partisipa iha jogu ne’e hosi rejiaun Ázia tomak hamutuk klube neen (6) hosi nasaun sira hanesan, Myanmar, Indonézia, Cambodia, Laos, Brunei ho Timor-Leste.
Rekizitu ba klube hosi nasaun neen (6) ne’ebé atu partisipa maka tenke sai kampiaun ba liga iha nasaun ida-idak no seluk tan tuir rekizitu AFC nian. Tanba-ne’e, Lalenok iha direitu absolutamente reprezenta Timor-Leste ba AFC Cup.
Jornalista : Hortencio Sanchez
Editór : Francisco Simões
