DILI, 16 marsu 2021 (TATOLI)—Koordenadór Pilar hitu no jestaun kazu COVID-19, Nilton da Silva, hateten bainhira atu evakua pasiente hosi ninia hela-fatin, depende ba rezultadu hosi Laboratóriu Nasionál Saúde (LABNAS).
“Rezultadu sai iha loron, ami ba foti kedan. Nune’e mós bainhira rezultadu sai iha kalan, ne’e mós ami tenke ba foti, tanba ami hetan ona ninia konfirmasaun,’’ Nilton da Silva hateten ba jornalista Agência Tatoli via telefóniaka, tersa ne’e.
Notisia relevante:Komunidade Caicoli trauma tanba SS-CIGC foti pasiente COVID-19 iha kalan
Molok atu halo evakuasaun, médiku ne’e tenke hetan sertifikadu pozitivu hosi pasiente ne’e rasik atu bele orienta ekipa ba tula.
Antes ne’e, Xefe suku Caicoli, Hipólito Marques Sarmento, hateten ninia-komunidade trauma, tanba parte Sala Situação Centro Integrado Gestão de Crises (SS- CIGC), foti sai pasiente COVID-19 hosi aldeia Devinu 12, iha tuku 22:00 (kalan).
Tanba ne’e, autoridade lokál ne’e rekomenda ba parte SS-CIGC katak, bainhira konfirma ona ema ruma ne’ebé pozitivu COVID-19, tenke foti sai hosi nia-hela fatin iha tempu loron.
Jornalista: Felicidade Ximenes
Editór: Cipriano Colo
