DILI, 23 marsu 2021 (TATOLI)-Maske Sekretária Estadu Protesaun Sivíl (SEPS) sei enfrenta menus rekursu umanu no ekipamentu, maibé SEPS halo servisu jestaun risku dezastre naturaís nian kumpre ba padraun sira Organizasaun Nasoins Unidu (ONU) nian.
Diretór Jerál Sekretáriu Estadu Protesaun Sivíl (SEPS), Superindente Asistente Polísia, Ismael Babo, hateten padraun ONU nian ne’ebé sai hanesan mata-dalan atu halo jestaun no responde ba siklu dezastre naturaís hosi fatór umanu maka hanesan prevensaun, apoiu emerjénsia ho rekuperasaun.
Notísia Relevante : Servisu Meteorolojia importante ba prevensaun dezastre naturaís
Maneira prevensaun sira mak apela komunidade atu labele konstrui uma besik iha area risku dezastre naturaís hanesan iha mota-ibun, foho-lolon no tasi-ibun no halo koordenasaun ho autoridade lokál hodi mobiliza komunidade hamoos valeta sira iha bairru sira.
“Bainhira akontese dezastre ona protesaun sivíl nia kna’ar atu haree responde imediatu salva ema nia vida, sasán ho apoiu emerjénsia ho rekuperasaun,” Ismael Babo hateten ba Agência Tatoli iha nia serbisu fatin, Caicoli, Dili, segunda ne’e .
Nia dehan, polítika jestaun risku dezastre nu’udar polítika nasionál ne’ebé integradu tanba ne’e presiza koordenasaun ho liña ministériu ba atuasaun sira.
“Oitavu Governu liu hosi SEPS tau ona prioridade ba dezenvolvimentu rekursu umanu, infraestrutura no fasilidade komunikasaun hodi apoiu liután serbisu sira,’’ Ismael Babo hateten.
Nia hateten, kontribuisaun komunidade importante tebes oinsá atu minimiza risku tanba mudansa situasaun klima ka fatór meteorolójiku sira ne’ebé karik enfrenta maka sidadaun hotu tenke iha sentidu nasionalizmu hanesan labele liga ahi eletrisidade ilegál ne’ebé bele provoka inséndiu, labele tesi ai arbiru, labele kee rai arbiru iha foho lolon no mota loran, labele konstrui uma iha area risku, labele soe lixu arbiru, evita sunu rai arbiru iha fatin sira ne’ebé perigu bainhira iha tempu bailoron naruk.
Jornalista : Nelson de Sousa
Editór : Francisco Simões
