DILI, 24 marsu 2021 (TATOLI)—KOICA Alumni Association of Timor-Leste (KAATL), apoia materiál dezifenfeta ba Grupu ’Mama Bolu’, ne’ebé halibur joven voluntáriu serbisu hamutuk ho ofisiál membru Polísia Nasionál Timor-Leste (PNTL) hodi kontinua dizinfeta fatin públiku ne’ebé risku ba propagasaun COVID-19.
Prezidente KAATL, Gil Boavida, nota katak durante ne’e país iha mundu tomak inklui Timor-Leste enfrenta hela situasaun pandemia globál, tanba ne’e durante tinan ida ona asosiasaun konsentra ba programa kombate no prevensaun COVID-19.
“Hahú tinan kotuk to’o agora, ami halo asaun karidade hodi suporta Ministériu Saúde, hanesan organiza talkshow iha Rádiu Televizaun Timor-Leste, Empreza Públika (RTTL,E.P) hodi fahe informasaun kona-ba prevensaun COVID-19, tanba tinan ne’e ami prevee orsamentu sufisiente atu kontribui,” Prezidente asosiasaun ne’e hateten hafoin entrega ekipamentu, iha Jardín 5 de Maio, Colmera, Dili, kuarta ne’e.
Notísia relevante: MTM kontinua dizinfeta fatin públiku ne’ebé risku ba propagasaun COVID-19
Sasán ajudu simu direta hosi Reprezentante Grupu no atuál Segundu Komandante Polísia Nasionál Timor-Leste, munisipiu Dili, Superintendente Euclides Belo.
Materiál prevensaun kompostu hosi Bayclin litru ida kaixa 20, deterjente mili litru 1.000 kaixa 38, inklui ai-han.
KAATL uza orsamentu annuál 2021, ne’ebé maka apoia hosi Korea International Cooperation Agency (KOICA) hodi sosa materiál.
“Kada Tinan asosiasaun hetan apoiu orsamentu hosi KOICA, tanba ne’e iha tinan 2021 ami prevee orsamentu hodi hala’o programa prevensaun COVID-19 iha Timor-Leste,” nia akresenta.
Iha fatin, Reprezentante Grupu Mama Bolu, Superintendente Euclides Belo, agradese ba inisiativa asosiasaun tanba apoia ona materiál dezifeta hodi grupu voluntáriu sira bele kontinua hala’o atividade.
“Timor-oan sira fó apoiu voluntáriamente dezinfeta ba grupu atu iha kbiit halo asaun dezinfeta, tanba ne’e hau lori ekipa Mama Bolu no PNTL apresia no agradese ba Alumni KOICA,” nia dehan.
Tuir nia, Alumni KOICA sai ezemplu ba timor-oan sira seluk, liuliu sira ne’ebé hamahan-an iha organizasaun no asosiasaun sira atu fó mós kontribuisaun hodi hakotu transmisaun vírus iha rai-laran.
Tuir oráriu ekipa Mama Bolu sei dizinfeta, klínika, postu Polísia, kuarentena no fatin públiku seluk ne’ebé iha risku kontaminasaun vírus.
Antes ne’e, ekipa voluntáriu ne’e dizinfeta ona Palásiu Prezidensiál, instituisaun Estadu balun no fatin públiku sira seluk.
Jornalista: Agapito dos Santos
Editora: Julia Chatarina
