Mate-isin Isodoro Quefi sei transporta ho aviaun ZEESM
DILI, 31 marsu 2021 (TATOLI)—Tuir planu, aban família sei transporta mate-isin Isodoro Neno Quefi ba moris fatin, Rejiaun Administrativa Espesiál Oe-cusse Ambeno (RAEOA), ho aviaun Zona Ekonomia Espesiál Sosiál Merkadu (ZEESM).
“Pedidu hosi família hetan ona aprovasaun no iha ona konkordánsia atu transporta mate-isin ba Oe-cusse iha aban dadeer ho aviaun ZEESM,’’ Família matebian, Marcos Caunan hateten ba jornalista Agência Tatoli via WhatsApp, kuarta ne’e.
Marcos konta tuir katak, durante semana ida família koordena ho parte Ministériu Solidariedade Sosiál no Inkluzaun (MSSI), Centro Integrado Gestão Crise, no mós Prezidente Autoridade RAEOA, ohin iha ona resposta pozitivu atu bele fasilita transportasaun ho transporte aero.
Parte família agradese ba Governu no autoridade RAEOA, ne’ebé responde ona pedidu família-nian, atu bele lori duni mate-isin ba Oe-cusse.
Isodoro Neno Quefi moris iha 15 abril 1994, iha aldeia Fatunababu, suku Usitaco, Sub-Rejiaun Nitibe, RAEOA no hakotu iis iha 29 marsu 2021 tanba sofre hepatitis ho komplikasaun, oras ne’e mate-isin rai-hela iha mortuáriu Hospitál Nasionál Guido Valadares (HNGV).
Matebian nu’udár estudante semester VII, Fakuldade Edukasaun espesializada Língua Portuguesa, Universidade Nasionál Timor Lorosa’e (UNTL).
Jornalista: Felicidade Ximenes
Editór: Cipriano Colo
