DILI, 05 abríl 2021 (TATOLI)—Governu deside hodi loke hikas loja sira ne’ebé mak fa’an materiál konstrusaun, nune’e komunidade bele sosa sasán presiza hodi normaliza sira-nia uma ne’ebé hetan estragu hosi dezastre naturál iha domingu ne’e.
“Governu halo desizaun katak loja sira ne’ebé fa’an materiál konstrusaun bele loke filafali, nune’e komunidade bele sosa sasán ne’ebé sira presiza no apela ba hirak ne’ebé fa’an ai-han hanesan restaurante ka warung sira mós bele loke nune’e ema ne’ebé hakarak sosa ai-han bele lori oferese ba ema ne’ebé presiza”, Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun interministeriál ba apoiu vítima dezastre naturál iha Palásiu Governu, segunda ne’e.
Maski nune’e, ba fatin fa’an ai-han seidauk autoriza kliente tuur hodi han iha fatin instalasaun, maibé permite tipu falun lori ba uma (take a way) ka lori ba kliente nia fatin no selu iha fatin (cash on delivery), nune’e bele fasilita ema bele sosa ai-han sira hodi ajuda populasaun ne’ebé presiza, liuliu ne’ebé afetadu hosi dezastre naturál.
Antes ne’e, impozisaun serka sanitária no konfinamentu domisiliáriu jerál obrigatóriu iha kapitál Dili, Governu deside taka loja kontrusaun sivíl maibé loja ne’ebé fa’an nesesidade bázika kontinua loke.
Notísia relevante: Reuniaun KM: deside serka sanitária iha Dili durante loron hitu
Portavós Governu ne’e dehan, akontesementu dezastre naturál ne’e halo komunidade sira difisil hetan ai-han tanba ema barak afetadu hotu ba dezastre ne’e.
“Iha ámbitu akontesementu ne’e, funsionáriu loja sira mós seidauk bele tama serbisu, nune’e loja sira mós la loke iha momentu akontesementu maibé ba oin maka bele loke hikas,” nia akresenta.
Jornalista: Antónia Gusmão
Editora: Julia Chatarina
